ភ្នំពេញ : បុរសម្នាក់បើករថយន្តឡិចសុីស RX330 មួយគ្រឿងបានជ្រុលចង្កូតទៅបុកចូលផ្ទះលក់គ្រឿងបន្លាស់រថយន្តមួយកន្លែងបណ្ដាលឲ្យទ្វារផ្ទះរងការខូចខាតយ៉ាងដំណំ។

ហេតុការណ៍នេះកើតឡើងកាលពីវេលាម៉ោង១០និង ១០ នាទីយប់ថ្ងៃទី ២៥ ខែសីហា ឆ្នាំ ២០២២ នៅត្រង់ចំណុចផ្ទះលក់គ្រឿងបន្លាស់រថយន្តមួយកន្លែងតាមបណ្តោយផ្លូវ ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសម្នាក់បើករថយន្តឡិចសុីស RX-330 មួយគ្រឿងពណ៌សពាក់ស្លាកលេខភ្នំពេញ2AP-3815ចេញពីផ្លូវ៥៩៨ មកផ្លូវ ១៩៨៦ក្នុងទិសដៅគេកើតទៅលិច លុះមកដល់ចំណុចកើតហេតុខាងលើស្រាប់តែរេចង្កូតនៅខាងស្ដាំដៃជ្រុលទៅបុកចូលផ្ទះលក់គ្រឿងបន្លាស់រថយន្ដពេញទំហឹង បណ្តាលឲ្យទ្វារផ្ទះរងការខូចខាតយ៉ាងដំណំ ចំណែករថយន្តរងការខូចខាតតិចតួច។

ក្រោយកើតហេតុសមត្ថកិច្ចមូលដ្ឋានបានចុះមកដល់បានឲ្យភាគីទាំងពីរធ្វើការសម្របសម្រួល ក្រោយមកខាងភាគីរថយន្តបាន ចេញថ្លៃជួសជុលឲ្យស្អាតឡើងវិញដើម្បីបញ្ចប់រឿងនៅនឹងកន្លែងកើតហេតុ៕

ដោយ៖ និន សុភ័ស្ត