ភ្នំពេញ៖ ជនសង្ស័យ៤នាក់ត្រូវបានសមត្ថកិច្ចនគរបាលខណ្ឌជ្រោយចង្វាឃាត់ខ្លួនពាក់ព័ន្ធករណីគ្រឿងញៀនដកហូតថ្នាំញៀន៤កញ្ចប់តូចនឹង១កញ្ចប់ធំ និងម៉ូតូ២គ្រឿង។

ប្រតិបត្តិការនេះធ្វើឡើងកាលពីម៉ោង១០យប់ថ្ងៃទី១៥ ខែឧសភា ឆ្នាំ២០១៦ នៅតាមផ្លូវជាតិលេខ៦ ស្ថិតក្នុងភូមិគៀនឃ្លាំង សង្កាត់-ខណ្ឌជ្រោយចង្វា។

សមត្ថកិច្ចនគរបាលខណ្ឌជ្រោយចង្វាបានឲ្យដឹងថា ជនសង្ស័យទី១.ឈ្មោះធី ផុណា ភេទប្រុស អាយុ២៥ឆ្នាំ មុខរបរមិនពិតប្រាកដ មានទីលំនៅភូមិសីុធរ ឃុំសីុធរ ស្រុកខ្សាច់កណ្តាល ខេត្តកណ្តាល ទី២.ឈ្មោះធី សុខណាត ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិសីុធរ ឃុំសីុធរ ស្រុកខ្សាច់កណ្តាល ខេត្តកណ្តាល ទី៣.ឈ្មោះភឿន ភាព ភេទប្រុស អាយុ២២ឆ្នាំ មុខរបរមិនពិតប្រាកដ មានទីលំនៅភូមិកាហែន ឃុំស្វាយរមៀត ស្រុកខ្សាច់កណ្តាល ខេត្តកណ្តាល ទី៤.ឈ្មោះអុន វណ្ណសីុ ភេទប្រុស អាយុ២៣ឆ្នាំ មុខរបរធ្វើចំការ មានទីលំនៅសង្កាត់ផ្សារដើមគរ ខណ្ឌទួលគោ។ វត្ថុតាងចាប់យករួមមាន៖ ថ្នាំញៀនក្រាម ពណ៌ថ្លាប្រភេទម៉ាទឹកកកចំនួន៥កញ្ចប់ (៤កញ្ចប់តូច) និងម៉ូតូ២គ្រឿង១គ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខកណ្តាល 1K-7521 និង១គ្រឿងទៀតម៉ាកហុងដាឌ្រីមសេ១១០ ពណ៌ខ្មៅ ពាក់ស្លាកលេខភ្នំពេញ1.BS-5675 ។

សមត្ថកិច្ចនគរបាលបន្តថា មុនពេលឃាត់ខ្លួនកាលពីម៉ោង១០យប់ថ្ងៃទី១៥ ខែឧសភា ឆ្នាំ២០១៦ កម្លាំងយើងបានល្បាតនៅក្នុងមូលដ្ឋាន ក៏ឃើញជនសង្ស័យខាងលើបានហៅឲ្យឈប់ ដើម្បីត្រួតពិនិត្យ រកឃើញថ្នាំញៀន៥កញ្ចប់ រួចក៏ឃាត់ខ្លួនជនសង្ស័យយកមកអធិការដ្ឋាននគរបាលខណ្ឌជ្រោយចង្វាដើម្បីសួរនាំ។

បច្ចុប្បន្នជនសង្ស័យទាំង៤នាក់រួមនឹងវត្ថុតាងកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕

ដោយ៖ ជ្រោយពេជ្រ