កីឡាប្រណាំងសេះត្រូវបានបញ្ឈប់កាលពីថ្ងៃព្រហស្បតិ៍បន្ទាប់ពីការសោយទីវង្គត់របស់ព្រះមហាក្សត្រីយានី Elizabeth II នៃប្រទេសអង់គ្លេស ខណៈដែលការប្រកួតកាលពីថ្ងៃសុក្រក្នុងការប្រកួតសាកល្បងរវាងប្រទេសអង់គ្លេស និងអាហ្វ្រិកខាងត្បូងត្រូវបានផ្អាកដែរ។
ការប្រជុំប្រណាំងនៅថ្ងៃសុក្រទាំងអស់ក្នុងប្រទេសអង់គ្លេសក៏ត្រូវបានលុបចោលផងដែរ រួមជាមួយនឹងការប្រកួតកីឡា Cricket Rachael Heyhoe Flint នៅថ្ងៃដដែល។ ចំណែកថ្ងៃទីពីរនៃការប្រកួត PGA Championship នៅថ្ងៃសុក្រក៏នឹងមិនប្រព្រឹត្តទៅដែរ។ លីកបាល់ទាត់អង់គ្លេសក៏បានពន្យារពេលការប្រកួតចំនួន២របស់ខ្លួននៅថ្ងៃសុក្រនេះផងដែរ។
សេចក្តីថ្លែងការណ៍របស់ EFL បាននិយាយថា “ការប្តេជ្ញាចិត្តទាក់ទងនឹងការប្រកួតដែលនៅសល់នៅចុងសប្តាហ៍នេះ នឹងត្រូវបានធ្វើឡើងបន្ទាប់ពីការពិនិត្យឡើងវិញនៃការណែនាំការកាន់ទុក្ខជាផ្លូវការ បន្ថែមពីលើការប្រឹក្សាបន្ថែមជាមួយ DCMS និងកីឡាផ្សេងទៀតនៅព្រឹកថ្ងៃសុក្រ“។
បន្ទាប់ពីការប្រកាសនេះ ការប្រជុំប្រណាំងសេះ Southwell ត្រូវបានបញ្ឈប់បន្ទាប់ពីការប្រណាំងលើកទីពីរ និងការប្រណាំងChelmsford បន្ទាប់ពីការប្រណាំងលើកទីបួន។ អាជ្ញាធរកីឡាជិះសេះរបស់ចក្រភពអង់គ្លេស ទំនងជានឹងធ្វើការសម្រេចចិត្តអំពីពេលដែលការប្រណាំងសេះនឹងបន្តឡើងវិញនៅថ្ងៃសុក្រ។
រីឯសេចក្តីថ្លែងការណ៍របស់ European Tour Group បានឲ្យដឹងថា “ដោយសារការគោរពចំពោះព្រះមហាក្សត្រិយានី និងព្រះរាជវង្សានុវង្ស ការលេងត្រូវបានផ្អាកក្នុងព្រឹត្តិការណ៍ BMW PGA Championship នៅ Wentworth Club សម្រាប់រយៈពេលដែលនៅសល់នៃថ្ងៃព្រហស្បតិ៍ ហើយទង់ជាតិនៅក្លិប Wentworth នឹងត្រូវបន្ទាបដល់ពាក់កណ្តាលដង។ លើសពីនេះគ្មានការលេងណាមួយនឹងធ្វើឡើងនៅ BMW PGA Championship នៅថ្ងៃសុក្រ ហើយទីលានវាយកូនហ្គោល និងកន្លែងហ្វឹកហាត់នឹងត្រូវបិទ។ សម្រាប់ព័ត៌មានបន្ថែមលើការបន្តការលេងឡើងវិញនឹងត្រូវបានផ្តល់ជូនក្នុងពេលកំណត់។ « សូម ចូលរួមរំលែក ទុក្ខ យ៉ាង ក្រៀមក្រំ បំផុត ជាមួយ គ្រួសារ រាជវង្ស នៅពេលនេះ » ” ។
នៅក្នុងវិស័យបាល់ទាត់ ក្រុម Manchester United បានប្រកាសឲ្យដឹងដែរថា ការប្រកួតរបស់ពួកគេជាមួយនឹងក្រុម Real Sociedad ក្នុងក្របខ័ណ្ឌ Europa League បានដំណើរការទៅមុខ “តាមការណែនាំពីសមាគមបាល់ទាត់ និង Uefa។ ការប្រកួតរបស់ West Ham ទល់នឹង FCSB ក្នុង Europa Conference League ក៏ត្រូវបានលេងផងដែរ។ ការប្រកួតជើងឯកស្កុតឡេននៅថ្ងៃសុក្ររវាង Cove Rangers និង Dundee ត្រូវបានពន្យារពេល។
ព្រឹត្តិការណ៍ប្រណាំងកង់ Tour of Britain បានបិទដំណាក់កាលទី៦កាលពីថ្ងៃសុក្រ មុនពេលដែលលុបចោលដំណាក់កាលដែលនៅសល់នៅចុងសប្តាហ៍។ បន្ថែមលើសេចក្តីថ្លែងការណ៍មុននេះ ទាក់ទងនឹងការលុបចោលដំណាក់កាលទី៦ ជាសញ្ញានៃការគោរពបន្ទាប់ពីការសោយទិវង្គតរបស់ព្រះមហាក្សត្រីយានី។ ស្ថាប័ន Tour of Britain រួមជាមួយនឹងក្រុមការងារ អ្នកជិះកង់ និងមន្ត្រីពាក់ព័ន្ធក្នុងព្រឹត្តិការណ៍នេះ សូមចូលរួមរំលែកទុក្ខដ៏ក្រៀមក្រំបំផុតចំពោះគ្រួសាររាជវង្សក្នុងគ្រាដ៏សោកសៅនេះ”។
នៅក្នុងសហជីពកីឡាបាល់ឱប Northampton បានផ្អាកការប្រកួត Premiership Rugby Cup របស់ពួកគេជាមួយនឹងក្រុមSaracens ដែលគ្រោងធ្វើកាលពីល្ងាចថ្ងៃព្រហស្បតិ៍។ការប្រកួតអន្តរជាតិរបស់ស្ត្រីស្កុតឡេនទល់នឹងក្រុមអេស្ប៉ាញនៅថ្ងៃអាទិត្យត្រូវបានលុបចោលដែរ ហើយការប្រកួតបាល់ឱបស្កុតឡេន (Scottish Rugby) ក៏បានពន្យារពេលការប្រកួតក្នុងស្រុកទាំងអស់នៅចុងសប្តាហ៍នេះ ដើម្បីជាការគោរព។
ព្រឹត្តិការណ៍ Formula 1 កំពុងរៀបចំផែនការស្ងប់ស្ងាត់១នាទីជាមួយក្រុមទាំងអស់ មុនពេលហ្វឹកហាត់នៅថ្ងៃសុក្រសម្រាប់ការប្រកួត Italian Grand Prix ជាមួយនឹងការប្រណាំងនៅចុងសប្តាហ៍ដើម្បីដំណើរការតាមការគ្រោងទុក។ ចំណែកនៅឯកីឡាវាយតឺន្នីស US Open នៅទីក្រុងញូវយ៉ក អ្នករៀបចំបាននិយាយថា “ដើម្បីរំលឹកដល់ការសោយទិវង្គតរបស់ម្ចាស់ក្សត្រី Elizabeth I នឹងមានភាពស្ងៀមស្ងាត់ដើម្បីគោរពព្រះវិញ្ញាណក្ខន្ធមុនពេលចាប់ផ្តើមការប្រកួតពាក់កណ្តាលផ្តាច់ព្រ័ត្រស្ត្រីលើកដំបូងរវាង Ons Jabeur និង Caroline Garcia” ។
សូមបញ្ជាក់ថា ម្ចាស់ក្សត្រី Elizabeth II ដែលជាក្សត្រីកាន់អំណាចយូរបំផុតរបស់ចក្រភពអង់គ្លេសបានសោយទិវង្គតក្នុងព្រះជន្មាយុ៩៦ព្រះវស្សាបន្ទាប់ពីសោយរាជ្យអស់រយៈពេល៧០ឆ្នាំ ៕ (រូបភាព ៖ BBC Sport)
