ខេត្តសៀមរាប៖ សម្តេចតេជោ ហ៊ុន សែន បានថ្លែងថា ទោះបីជាលោក ហ៊ុន ម៉ាណែត ជាកូនអ្នកណាក៏ដោយ ក៏សម្តេចគាំទ្រឲ្យធ្វើជានាយករដ្ឋមន្ត្រី នាពេលអនាគតដែរ ពីព្រោះថា លោក ហ៊ុន ម៉ាណែត ជាមនុស្សមានលក្ខណៈត្រឹមត្រូវ សមនឹងធ្វើតួនាទីនេះ និងសមជាអ្នកដឹកនាំ របស់គណបក្សប្រជាជនកម្ពុជា។
-សម្តេចតេជោ ហ៊ុន សែន បានថ្លែងថា ណែនាំឱ្យកងទ័ពជួយដឹកជញ្ជូនសម្ភារប្រជាពលរដ្ឋដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ មករស់នៅភូមិធម្មជាតិរុនតាឯក។
-សម្តេចតេជោ ហ៊ុន សែន បានថ្លែងជឿរជាក់ថា បេីអត់ពីសម្ដេច គ្មានអ្នកគណបក្សនយោបាយណាដឹកនាំប្រទេស ក្រៅពីគណបក្សប្រជាជនកម្ពុជានោះឡើយ
-សម្តេចតេជោ ហ៊ុន សែន ថ្លែងថា មានសម្បត្តិបេតិកភណ្ឌពិភពលោកច្រើនណាស់ រួមទាំងនៅប្រទេសអាល្លឺម៉ង់ផង ត្រូវបានដកចេញពីបញ្ជីសម្បត្តិបេតិកភណ្ឌពិភពលោក ព្រោះតែបាត់បង់លក្ខណៈសម្បត្តិកំណត់ដោយអង្គការយូណេស្កូ
-សម្តេចតេជោ ហ៊ុន សែន ថ្លែងថា តំបន់រមណីយដ្ឋានអង្គរ ពេលដាក់ចូកក្នុងបញ្ជីសម្បត្តិបេតិកភណ្ឌពិភពលោក នៅឆ្នាំ១៩៩២ហើយនោះ ត្រូវបានអនុវត្តតាមលក្ខន្តិកៈ ទាំងឡាយកំណត់ដោយអង្គការយូណេស្កូ
-សម្តេចតេជោ ហ៊ុន សែន ថ្លែងថា អរគុណប្រជាពលរដ្ឋដែលព្រមរុះរើចេញពីតំបន់រមណីយដ្ឋានអង្គរ និងអរគុណលោកឧបនាយករដ្ឋមន្ត្រី ជា សុផារ៉ា សម្រាប់ការដឹកនាំក្រុមការងារចុះរុះរេីសំណង់។
-សម្តេចតេជោ ហ៊ុន សែន ថ្លែងថា ព្រះបរមរតនកោដ្ឋ នរោត្តមសីហនុ បានយកព្រះទ័យទុកដាក់ខ្លាំងណាស់លេីតំបន់រមណីយដ្ឋានអង្គរ ។
-សម្តេចតេជោ ហ៊ុន សែន បាថ្លែងរម្លឹកថា ព្រះបរមរតនកោដ្ឋ បានផ្ដួចផ្ដេីមព្រះបញ្ញាញាណដោយផ្ទាល់ក្នុងការស្នេីដាក់តំបន់រមណីយដ្ឋានអង្គរ ក្នុងបញ្ជីបេតិកភណ្ឌពិភពលោក ហេីយសម្ដេចបានបង្ហាញការគាំទ្រទាំងស្រុង។
-សម្តេចតេជោ ហ៊ុន សែន ប្រកាសឧបត្ថម្ភដល់ប្រជាពលរដ្ឋ ដែលមកតាំងលំនៅឋាន ថ្មីនៅតំបន់រុនតាឯក ក្នុងមួយគ្រួសារ ១លានរៀល ដើម្បីសាងសង់លំនៅឋាន និងឧបត្ថម្ភសម្ភារៈ(សាងសង់ផ្ទះមួយចំនួន) ព្រមទាំងគ្រឿងឧបភោគបរិភោគជាច្រើនផងដែរ។
-សម្តេចតេជោ ហ៊ុន សែន ប្រកាសផ្តល់ប័ណ្ណស្ត្រីមានផ្ទៃពោះ និងប័ណ្ណក្រីក្រ ដែលត្រូវទទួលបានប្រាក់ឧបត្ថម្ភ សម្រាប់ជួយក្នុងវិបត្តិកូវីដ-១៩ ដល់ប្រជាពលរដ្ឋដែលមកតាំងទីលំនៅឋានថ្មី នៅតំបន់រុនតាឯក បន្ថែមលើការឧបត្ថម្ភ ដែលរដ្ឋបានកំណត់កន្លងមក។
-សម្តេចតេជោ ហ៊ុន សែន បញ្ជាឱ្យកងពលទទួលទិសសៀមរាប ទទួលបន្ទុកដឹកប្រជាពលរដ្ឋចេញពីតំបន់រុះរើ ក្នុងតំបន់រមនីយដ្ឋានអង្គរ និងតំបន់ហាមឃាត់ មកទីតាំងថ្មីនៅតំបន់រុនតាឯក ដោយយកតែប្រជាពលរដ្ឋណា ដែលមានក្បាលដីដែលឈូសឆាយរួចតែប៉ុណ្ណោះ ដើម្បីឱ្យពួកគាត់សាង់លំនៅឋាន និងដាំដុះ។
សូមជម្រាបថា ប្រសាសន៍សំខាន់ៗ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វេីឡេីងនៅព្រឹកថ្ងៃអង្គារ ៣ រោច ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៣ ខែកញ្ញា ឆ្នាំ២០២២នេះក្នុងពិធីសំណេះសំណាលជាមួយប្រជាពលរដ្ឋដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ធ្វើឡើងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប ស្ថិតក្រោមការគ្រប់គ្រងរបស់អាជ្ញាធរជាតិអប្សរា មកទីតាំងថ្មីដែលរាជរដ្ឋាភិបាលផ្តល់ដីជូនពលរដ្ឋជាថ្នូរនឹងការរុះរើសំណង់ចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា៕
ដោយ៖ស តារា
