ភ្នំពេញ ៖ ខាងថ្នាក់ដឹកនាំក្រសួងអប់រំ យុវជននិងកីឡា កំពុងស្រាវជ្រាវ ករណីនាយកវិទ្យាល័យហ៊ុនសែន សេរីភាព ក្រុងតាខ្មៅ វាយសិស្សស្រី ខណៈការអប់រំចំណេះទូទៅ ជាការចាំបាច់ដែលធ្វើឱ្យអ្នកសិក្សាមានការរីកចម្រើនចំណេះដឹង និងសីលធម៌ បុគ្គលិកលក្ខណៈល្អ ដោយលើកកម្ពស់សមត្ថភាពខាងផ្លូវចិត្ត បញ្ញា កាយ និងធានាឱ្យចេះប្រើចំណេះដឹង និងបំណិនមូលដ្ឋាន។
លោក រស់ សុវាចា មន្ត្រីជាន់ខ្ពស់ក្រសួងអប់រំ ក៏បានលើកពីច្បាប់ស្តីពីការអប់រំ មកពន្យល់រួមមាន៖
-មាត្រា១៧ : នៃច្បាប់ស្តីពីការអប់រំ បានចែងថាការអប់រំចំណេះទូទៅ ជាការចាំបាច់ដែលធ្វើឱ្យអ្នកសិក្សាមានការរីកចម្រើនចំណេះដឹង និងសីលធម៌ បុគ្គលិកលក្ខណៈល្អ ដោយលើកកម្ពស់សមត្ថភាពខាងផ្លូវចិត្ត បញ្ញា កាយ និងធានាឱ្យចេះប្រើចំណេះដឹង និងបំណិនមូលដ្ឋាន។
– មាត្រា ៣៥ : នៃច្បាប់ស្តីពីការអប់រំ បានចែងពីសិទ្ធនិងករណីយកិច្ចរបស់អ្នកសិក្សាទាក់ទងនឹងការអប់រំថាមាន សិទ្ធទទួលបានការគោរព និងការយកចិត្តទុកដាក់ចំពោះសិទ្ធមនុស្សជាពិសេសសិទ្ធមានសេចក្តីថ្លៃថ្នូរ សិទ្ធរួចផុតពីទារុណកម្ម ឬការដាក់ទណ្ឌកម្មលើរាងកាយ និងផ្នែកស្មារតី។
លោកបានបន្តថា, «អ្នកសិក្សាមានករណីកិច្ចគោរពបទបញ្ជាផ្ទៃក្នុងរបស់គ្រឹះស្ថានសិក្សា តម្លៃខាងសមធម៌យេនឌ័រ ដោយអនុវត្តសិទ្ធរបស់ខ្លួនប្រកបដោយស្មារតីទទួលខុសត្រូវ និងគោរពសិទ្ធអ្នកដ៏ទៃដើម្បីលើកកម្ពស់សុខភាពផ្លូវកាយ ចិត្ត និងគុណភាពលទ្ធផលសិក្សា»។
សូមបញ្ជាក់ថា, អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានថ្លែងប្រាប់សារព័ត៌មាន នៅរសៀលថ្ងៃទី១៤ ខែកញ្ញា ឆ្នាំ២០២២នេះថា ក្រសួងកំពុងស្រាវជ្រាវករណីវីដេអូបែកធ្លាយ បង្ហាញពីសកម្មភាពនាយកវិទ្យាល័យហ៊ុនសែន សេរីភាព ក្រុងតាខ្មៅ ខេត្តកណ្តាល វាយសិស្សស្រីម្នាក់។
វីដេអូមួយដែលត្រូវបានចែកចាយលើបណ្តាញសង្គមត្រូវបានអះអាងថា នាយកវិទ្យាល័យហ៊ុនសែន សេរីភាព ក្រុងតាខ្មៅ ដែលវាយសិស្សស្រីនោះ មានឈ្មោះថា ម៉ម សុធានី។
សូមបញ្ជាក់ថា, វីដេអូនេះ ត្រូវបានគេបង្ហោះព្រោងព្រាត ជាមួយនឹងការរិះគន់ធ្ងន់ធ្ងរទៅ គ្រូដែលប្រើហិង្សាលើសិស្សស្រី នោះ សង្ឃឹមថាថ្នាក់ដឹកក្រសួងអប់រំយុវជននិងកីឡា នឹងចាត់វិធានការតាមផ្លូវច្បាប់ ដើម្បីពង្រឹងលើវិស័យអប់រំ អោយមានស្តង់ដារ ប្រកបដោយ សុជីវធម៌។
បើតាមលោក រស់ សុវាចា បានបញ្ជាក់យ៉ាងដូច្នេះ «ក្រសួងអប់រំ យុវជន និងកីឡាកំពុងស្រាវជ្រាវករណីនេះ។ ក្រសួងអប់រំ យុវជន និងកីឡា សូមថ្លែងអំណរគុណចំពោះមហាជន ដែលបាននិងបន្តចូលរួមសហការ រួមទាំងផ្តល់ដំណឹងក្នុងន័យចូលរួមលើកកម្ពស់ គុណភាពអប់រំកម្ពុជា»។
អ្នកនាំពាក្យក្រសួងអប់រំបានបន្តថា ករណីមានបាតុភាពនៅតាមគ្រឹះស្ថានសិក្សា គណៈគ្រប់គ្រងគ្រឹះស្ថានសិក្សាត្រូវចាត់វិធានការរដ្ឋបាល បើចាំបាច់អាចសហការជាមួយមន្ទីរអប់រំ យុវជន និងកីឡាទាំង ២៥ខេត្ត រាជធានីដែលជាសេនាធិការរបស់ក្រសួងអប់រំ យុវជន និងកីឡា។ វិធានការរដ្ឋបាលមាន២កម្រិត។ វិធានការរដ្ឋបាលថ្នាក់ទី១ គឺស្តីបន្ទោសជាលាយលក្ខអក្សរ និងផ្លាស់ដោយបង្ខំ និងវិធានការរដ្ឋបាលទី២ គឺលុបឈ្មោះចេញពីក្របខណ្ឌ។
លោកបន្តថា ក្រសួងអប់រំ យុវជន និង កីឡា ស្វាគមន៍ និងថ្លែងអំណរគុណចំពោះកិច្ចសហការណ៍វិជ្ជមានពីក្រសួង-ស្ថាប័នពាក់ព័ន្ធ ដៃគូរអភិវឌ្ឍន៍ បុគ្គលិកអប់រំ អាជ្ញាធរមូលដ្ឋាន ក្នុងការចូលរួមលើកកម្ពស់សុខភាពសិក្សា និងលុបបំបាត់អំពើហិង្សា ដែលត្រូវការការចូលរួមពីគ្រប់តួអង្គពាក់ព័ន្ធរួមទាំងមាតាបិតាផង។ លោកគ្រូ អ្នកគ្រូបាននិងបន្តដើរតួនាទីសំខាន់មួយ ក្នុងការចូលរួមលុបបំបាត់អំពើហិង្សាតាមរយ:គ្រប់មធ្យោបាយ ដូចជាការបង្រៀន និងយន្តការលើកទឹកចិត្តសិស្សានុសិស្សឲ្យបន្តរៀនសូត្រ ក្នុងន័យពង្រឹងសមត្ថភាពសម្រាប់ចូលរួមអភិវឌ្ឍន៍សេដ្ឋកិច្ចកម្ពុជានាពេលបច្ចុប្បន្ន និងអនាគត។
សូមជម្រាបជូនថា, អំពើហិង្សានេះ បានបង្ហាញអំពីការបាត់បង់សីលធម៌ក្នុងនាមជាថ្នាក់ដឹកនាំ នាយកគ្រប់គ្រងវិទ្យាល័យ ។ ដូច្នេះបើក្រសួងអប់រំយុវជននិងកីឡា រកឃើញនូវកំហុសពាក់ព័ន្ធទៅនឹងនាយកវិទ្យាល័យហ៊ុនសែន សេរីភាព ក្រុងតាខ្មៅ វាយសិស្សស្រី អាចនឹងមានវិធានការផ្លូវច្បាប់ ខណៈប្រទេសគ្រប់គ្រងដោយច្បាប់ ហើយក្រសួងអប់រំកំពុងពង្រឹង លើវិស័យអប់រំ ក្រមសីលធម៌ បង្កើនចំណេះដឹង ជំរុញឲ្យការបណ្ដុះបណ្ដាល មានការរីកចម្រើននោះ ៕
ដោយ : សហការី
