ភ្នំពេញ ៖ បុរសម្នាក់បានបេីករថយន្ដស៊េរីទំនើបម៉ាកMazda CX5 មួយគ្រឿង រួចរ៉េចង្កូតទៅបុករបាំងថ្មពុះចែកទ្រូងផ្លូវពេញទំហឹងបណ្ដាលឲ្យបាក់អស់១កង់រងការខូចខាត កាលពីវេលាម៉ោង៩:៥០នាទីយប់ថ្ងៃទី២១ ខែកញ្ញា ឆ្នាំ២០២២ ស្ថិតតាមបណ្ដោយផ្លូវជាតិលេខ២ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ
តាមប្រភពព័ត៌មានពីកន្លែងកើតហេតុបានឲ្យដឹងថា នៅពេលកើតហេតុ គេឃើញរថយន្ដស៊េរីទំនើបម៉ាកMazda CX5 ពណ៌ស ពាក់ផ្លាកលេខ ភ្នំពេញ 2AV-0278 ដែលបើកបរដោយបុរសម្នាក់ ធ្វើដំណើរតាមបណ្ដោយផ្លូវជាតិលេខ២ ទិសដៅពីត្បូងមកជើងក្នុងល្បឿនលឿនល្មម ខណៈមកដល់ចំណុចកើតហេតុក៏រ៉េចង្កូតមកឆ្វេងដៃបុករបាំងថ្មពុះចែកទ្រូងផ្លូវបណ្ដាលឲ្យបាក់អស់១កង់ និងធ្វើឲ្យរថយន្តបង្ករងការខូចខាតពីមុខចំហៀងខាងស្ដាំជាខ្លាំង សំណាងល្អក្នុងហេតុការណ៍នេះមិនបណ្ដាលឲ្យមនុស្សណាម្នាក់រងរបួសនោះឡើយ ។
ក្រោយពេលកេីតហេតុ សមត្ថកិច្ចមូលដ្ឋាន សហការជាជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វេីការវាស់វែងយករថយន្តទៅរក្សាទុករងចាំធ្វើការដោះស្រាយនៅពេលក្រោយ ៕
ដោយ ៖ ភារ៉ា ដង្កោ
