អ្នកទោសជាច្រើននៅទីក្រុង Mosul ប្រទេសអីរ៉ាក់ ត្រូវបានក្រុមអិស្លាមបង្កើតរដ្ឋកាត់ទោសប្រហារជីវិតតាមរយៈការចាប់អ្នកទោសចូលក្នុងទឹកអាស៊ីត។
ពេលថ្មីៗនេះក្រុមភេរវកម្ម IS បានធ្វើការកាត់ទោសអ្នកទោសដែលធ្វើការឲ្យកម្លាំងរដ្ឋាភិបាលអីរ៉ាក់ ក្នុងនោះមានក្រុមចារកម្មជាដើម។ ប្រភពព័ត៌មានបានឲ្យដឹងថា អ្នកទោសត្រូវបានចង់ខ្សែអូសឡើងទៅលើរួចច្រឡក់ចូលក្នុងទឹកអាស៊ីត ដែលអាចស៊ីដាច់ខ្លួនប្រាណអ្នកទោសទាំងនោះ។
ក្នុងរយៈពេលកន្លងមកនេះក្រុមទាហាន IS បានធ្វើការសម្លាប់អ្នកទោសយ៉ាងសហាវព្រៃផ្សៃបំផុតដើម្បីបំបាក់ស្មារតីក្រុមទាហ៊ានអ៊ីរ៉ាក់។ កាលពីសប្តាហ៍មុនក្រុម IS បានកាត់ទោសប្រហារជីវិតអ្នកទោស ១១នាក់ នៅក្នុងទីក្រុង Mosul ដោយសារតែអ្នកទាំងនោះបានប្រើប្រាសទូរស័ព្ទដៃដែលជាការហាមប្រាម។
កន្លងមកក្រុម IS បានដុតបំផ្ទុះសម្លាប់មនុស្ស៥នាក់នៅក្នុងគ្រួរសារស្ថិតនៅទីក្រុង Kirkuk ក្រោយពេលដែលក្រុម IS ដឹងថា គ្រួសារខាងលើព្យាយាមគេចចេញពីទីកន្លែងដែលពួគេគ្រប់គ្រង។
កន្លងមកក្រុម IS ក៏បានកាត់ទោសប្រហារជីវិតតាមរយៈការដាក់នៅក្នុងទ្រុងដែករួមគ្នា ហើយយកទៅដាក់ចូលក្នុងទឹករហូតដល់ស្លាប់ ។ ការប្រហារជិវិតតាមរូបភាពសហាវៗរបស់ក្រុម IS ក្រោយពេលដែលក្រុមនេះកំពុងតែបាត់បង់ទីតាំងជាច្រើនដែលខ្លួនធ្លាប់គ្រប់គ្រងកន្លងមក ទើបកាត់ទោសជាការប្រមានដល់ពលរដ្ឋរស់នៅក្នុងតំបន់ដែលខ្លួនគ្រប់គ្រងកំឲ្យក្រោកឈរឡើងប្រឆាំងឬជួយដល់ទាហានរដ្ឋាភិបាល។
កាលពីថ្ងៃទី១៧ ខែឧសភា កម្លាំងទាហានអ៊ីរ៉ាក់បានវាយប្រហាររំដោះបានស្រុក Rutbah ទីក្រុង អានបា ពីដៃក្រុមអិស្លាមបង្កើតរដ្ឋ IS។សារព័ត៌មាន AFP បានផ្សាយថា មេបញ្ចាការកងទ័ពនៅក្នុងខេត្តអានបា បញ្ចាក់ថា កម្លាំងទាហានរដ្ឋាភិបាលបានរំដោះស្រុក Rutbah បានទាំងស្រុងពីក្រុង IS កាលពីថ្ងៃទី១៧ ខែឧសភា ។
ជាមួយនឹងការដណ្តើមបានទីតាំងគ្រប់គ្រងខាងលើក្រុមអិស្លាម IS កំពុងតែបាត់បង់ទីតាំងជាបន្តបន្ទាប់ទាំងនៅក្នុងទឹកដីស៊ីរីនិងអីរ៉ាក់ផងដែរ។
ជាមួយគ្នានេះកម្លាំងទាហានរដ្ឋាភិបាលបានបង្កើតការប្រុងប្រយ័ត្នខ្លាំក្រុម IS បើកការវាយប្រហារទៅលើទីតាំងនានាក្រោយពេលក្រុមនេះបាត់បង់ទឹកដីដែលខ្លួនធ្លាប់គ្រប់គ្រង។ កន្លងមកថ្មីៗមានការវាយប្រហារគ្រាប់បែក៣លើកផ្សេងគ្នាបណ្តាលឲ្យមានអ្នកស្លាប់និងរងរបួសជាច្រើននៅកណ្តាលទីក្រុងបាតដាត។
យ៉ាងហោចណាស់មនុស្ស ៣១នាក់ស្លាប់ និង ៨២នាក់ រងរបួសនៅក្នុងករណីបំផ្ទុះគ្រាប់បែកនៅទីតាំង៣កន្លែងផ្សេងគ្នានៅក្នុងរដ្ឋធានីបាដាត នៃប្រទេសអ៊ីរ៉ាក់។
ទីភ្នាក់ងារព័ត៌មានចិន ស៊ិនហួ ចេញនៅមុនបន្តិចឲ្យដឹងថា ការវាយប្រហារនោះ មានករណីបំផ្ទុះគ្រាប់បែកអត្តឃាត និងការបំផ្ទូះដោយកំណត់ម៉ោងផងដែរ។
ភ្លាមៗក្រោយបំផ្ទុះ ក្រុមរដ្ឋឥស្លាមបានចេញមុខទទួលខុសត្រួវចំពោះការបំផ្ទុះ ដែលបណ្តាលឲ្យមនុស្សម្នាជាច្រើននាក់ស្លាប់និងរបួស។
ក្រោយពេលបាត់បង់ទឹកដីគ្រប់គ្រងជាង៤០ភាគរយទាំងនៅក្នុងប្រទេសស៊ីរីនិងអីរ៉ាក់ក្រុម IS បានបង្កើនសកម្មភាពវាយប្រហារភេរវកម្មទៅលើពលរដ្ឋស្លូតត្រង់ជាការគម្រាមទៅលើអាមេរិកនិងសម្ព័ន្ធមិត្តឲ្យបញ្ចប់ការវាយប្រហារទៅលើទីតាំងរបស់ពួកគេ។
កន្លងមកថ្មីៗក្រុមភេរវកម្មបានវាយប្រហារទៅលើទីតាំងជនភៀសខ្លួននៅក្នុងប្រទេសស៊ីរី បណ្តាលឲ្យមានអ្នកស្លាប់និងរបួសជាង៧០នាក់៕
ប្រែសម្រួល៖ ម៉ែវ សាធី
