ខ្សែការពារក្រុមហង្សក្រហម Liverpool កីឡាករ Trent Alexander-Arnold និងកីឡាករ Joel Matip ត្រូវបានគេរំពឹងថា នឹងអវត្តមានរហូតដល់៣សប្តាហ៍ដោយសាររបួស។

ខ្សែការពារស្តាំរបស់អង់គ្លេសទាំង២គឺ Alexander-Arnold បានរងរបួសកជើង និងខ្សែការពារកណ្តាល Matip មានបញ្ហាកំភួនជើង បានចូលលេងកាលពីប៉ះក្រុមកាំភ្លើងធំ Arsenal កាលពីថ្ងៃអាទិត្យសប្តាហ៍មុន។

ចំណែកខ្សែ​បម្រើ​ស្លាប Luis Diaz ក៏ត្រូវ​បាន​គេដឹងថាអាចនឹងមិនបានបង្ហាញខ្លួនដែរ ​ដោយ​សារ​របួស​ជង្គង់ដែល​បាន​ចូល​លេង​ទល់​នឹង Arsenal រហូត​ដល់​ខែ​ធ្នូនៅពេលដែល Liverpool បានចាញ់ ៣–២ ក្រោមថ្វីជើង Arsenal នៅកីឡដ្ឋាន Emirates ។

លទ្ធផលនេះបានធ្វើឱ្យហង្សក្រហមស្ថិតក្នុងចំណាត់ថ្នាក់ទី១០ដោយមាន១០ពិន្ទុ និងចាញ់ក្រុមកំពូលតារាង Arsenal ១៤ពិន្ទុបន្ទាប់ពីឈ្នះតែ២ប៉ុណ្ណោះក្នុងចំណោមការប្រកួតបើកឆាក Premier League ៨លើករបស់ពួកគេ។

ក្រុមរបស់លោក Jurgen Klopp មានការប្រកួតចំនួន៦ដែលបានគ្រោងទុកនៅចន្លោះពេលនេះដល់ចុងខែតុលា រួមទាំងការប្រកួតក្នុងផ្ទះជាមួយក្រុមជើងឯក Manchester City នៅថ្ងៃអាទិត្យសប្តាហ៍នេះផងដែរ។

ក្រុមនេះក៏​គ្មាន​ខ្សែ​បម្រើ Arthur Melo, Alex Oxlade-Chamberlain និង Naby Keita ដោយ​របួស​ភ្លៅ​រួច​ទៅ​ហើយ ខណៈ​ខ្សែ​ការពារ Andrew Robertson មាន​បញ្ហា​ជង្គង់។ ចំណែក Curtis Jones បានត្រលប់មកហ្វឹកហាត់វិញហើយ បន្ទាប់ពីមានបញ្ហាកំភួនជើង ហើយអាចត្រលប់មកវិញជាមួយ Rangers ក្នុង Champions League នៅរាត្រីថ្ងៃពុធនេះ។

គួរបញ្ជាក់ថា ក្រុមហង្សក្រហម Liverpool នឹងត្រូវប៉ះក្រុមម្ចាស់ផ្ទះ Rangers ក្នុងវគ្គជម្រុះ Champions League នៅវេលាម៉ោង២រំលងអធ្រាត្រម៉ោងនៅកម្ពុជា ក្នុងការប្រកួតនៅពូល A។ បច្ចុប្បន្ន Liverpool ស្ថិតក្នុងចំណាត់ថ្នាក់លេខ២ក្នុងពូលមាន៦ពិន្ទុស្មើពិន្ទុជាមួយក្រុមលេខ១ Napoli ដែលមាន៦ពិន្ទុដែរ ហើយនឹងត្រូវប៉ះក្រុម Ajax នៅថ្ងៃជាមួយគ្នាដែរ ៕ (រូបភាព ៖ BBC Sport)