ភ្នំពេញ ៖ ស្ត្រីម្នាក់បានរងរបួសធ្ងន់ត្រូវបានរថយន្តសាមុយដឹកយកទៅសង្គ្រោះបន្ទាន់ភ្លាមៗ ខណៈកំពុងបើកម៉ូតូត្រូវរថយន្តមកពីក្រោយបុកយ៉ាងពេញទំហឹង អូសម៉ូតូជាប់រថយន្តនៅខាងមុខរថយន្តមើលទៅគួរឱ្យរន្ធត់បំផុត។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៨យប់ថ្ងៃទី១២ខែតុលាឆ្នាំ២០២២ ស្ថិតនៅតាមផ្លូវបុរីអង្គរក្នុងសង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញស្ត្រីរងគ្រោះបើកម៉ូតូម៉ាកហុងដាឌ្រីម សេ១២៥ ពណ៌ក្រហមពាក់ស្លាកលេខភ្នំពេញ1AC-5517 តាមបណ្ដោយផ្លូវបុរីអង្គរក្នុងទិសដៅពីជើងទៅត្បូង ខណៈបើកម៉ូតូមកដល់ចំណុចកើតហេតុ ស្រាប់តែមានរថយន្តបង្កម៉ាកព្រូស ពណ៌ស ពាក់ស្លាកលេខភ្នំពេញ 2BK-6425 បើកបរដោយបុរសម្នាក់ធ្វើដំណើរតាមបណ្តោយផ្លូវបុរីអង្គរស្របទិសគ្នាពីជើងទៅត្បូងក្នុងល្បឿនយ៉ាងលឿនបានជ្រុលទៅបុកម៉ូតូពីក្រោយពេញទំហឹងបណ្ដាលឱ្យស្ត្រីរងគ្រោះប៉ើងទៅបោកផ្ទប់នឹងកញ្ចក់រថយន្តធ្លាក់មកបោកនឹងថ្នល់រងរបួសធ្ងន់ ត្រូវបានរថយន្តសាមុយដឹកយកទៅសង្រ្គោះបន្ទាន់ភ្លាមៗ ចំណែករថយន្តបន្តបើកអូសម៉ូតូទៅមុខជាច្រើនម៉ែត្រ ហើយភ្លាមៗនោះដែរ ប្រជាពលរដ្ឋជិតខាងបានជួយដេញពីក្រោយឃាត់បានអ្នកបើកបរនិងរថយន្តប្រគល់ឱ្យសមត្ថកិច្ច។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ធ្វើការវាស់វែងយករថយន្តនិងម៉ូតូទៅរក្សាទុករង់ចាំដោះស្រាយគ្នានៅពេលក្រោយ៕ ដោយ៖ជ្រោយពេជ្រ