ខេត្តសៀមរាប ៖ ថ្លែងក្នុងពិធីជួបសំណេះសំណាលជាមួយពលរដ្ឋដែលព្រមផ្លាស់ទីលំនៅនៅតំបន់ពាក់ស្នែង ព្រឹកថ្ងៃទី២២ ខែតុលា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា កាលពីយប់ថ្ងៃទី២១ ខែតុលា បានសម្រេចបញ្ជូនស្បៀងចំនួន២០០តោន និងថវិកាចំនួន១៥ម៉ឺនដុល្លារដើម្បីជួយពលរដ្ឋក្នុងខេត្តកំពង់ធំពីការលិចលង់ពីទឹកជំនន់។
សម្ដេចបន្ថែមថាក្រៅពីសម្រេចបញ្ជូនស្បៀងនិងថវិកាទាំងនេះនៅថ្ងៃទី២៩ ខែតុលា ខាងមុខសម្ដេចតេជោក៏នឹងចុះទៅជួបពលរដ្ឋរងគ្រោះដោយផ្ទាល់ផងដែរ។
សម្ដេចតេជោ ហ៊ុន សែន បានលើកឡើងថា ការបញ្ជូនស្បៀងបន្ទាន់ទាំងយប់ទៅជួយខេត្តកំពង់ធំនេះ គឺដោយសារស្ថានភាពទឹកជំនន់ក្នុងខេត្តនេះបានបង្កផលប៉ះពាល់ខ្លាំងដល់ពលរដ្ឋ។
សម្ដេចតេជោ គូសបញ្ជាក់ថា៖ ម្សិលមិញលោក ងួន រតនៈ អភិបាលខេត្តកំពង់ធំ ក៏បានដើរចែកជំនួយដែលខ្ញុំបានបញ្ជូនទៅមុន ឥឡូវបានបញ្ជូនទៅថែម។ ប៉ុន្ដែក៏សុំបញ្ជាក់ទៅបងប្អូននៅខេត្តកំពង់ធំថាខ្ញុំនឹងទៅកាន់ខេត្តកំពង់ធំនៅថ្ងៃទី២៩ (ខែតុលា)។
សម្ដេចតេជោ ហ៊ុន សែន ថ្លែងថា៖ គេនឹងចោទថាខ្ញុំឃោសនាបោះឆ្នោតមុនអាណត្តិ មុនការកំណត់ ក៏ប៉ុន្ដែនេះជាសិទ្ធិនិយាយស្ដីរបស់ខ្ញុំ ព្រោះអ្នកដទៃចេះតែទៅស្នើឱ្យគេបោះឆ្នោតឱ្យ តែខ្ញុំក៏ស្នើឱ្យប្រជាជនបោះឆ្នោតឱ្យខ្ញុំ ឱ្យគណបក្សប្រជាជនដែរ»។
សម្ដេចតេជោ ថ្លែងបន្តថា៖ ព្រោះអញ្ចេសចំណងទាក់ទងរបស់យើងត្រូវនៅជាប់គ្នា១០ឆ្នាំ ព្រោះអី? ព្រោះខ្ញុំត្រូវប្រកាសគោលនយោបាយមួយអំពីបញ្ហាទាក់ទិននឹងផ្ដល់ប័ណ្ណក្រីក្ររយៈពេល ១០ឆ្នាំ អញ្ចឹងយើងមានការទាក់ទងគ្នា១០ឆ្នាំ។ និយាយដូច្នេះមិនមែនមានន័យថាយកបណ្ណក្រីក្រចងប្រជាជន ដើម្បីបោះឆ្នោតជូនគណបក្សប្រជាជននោះទេ។ តែបងប្អូនសាកគិតមើលអ្នករាប់ចំឱ្យគឺគណបក្សប្រជាជនគឺ ហ៊ុន សែន ដល់ទៅបោះឆ្នោតទៅគណបក្សដទៃដូចវាមិនសមទេអី!។
សម្តេចតេជោ ថ្លែងថា ប៉ុន្តែបើនិយាយឱ្យឡូស៊ិចទៅយើងបៅដោះម្ដាយរបស់យើងមិនអាចបែរទៅសម្លាប់ម្ដាយរបស់យើងបានទេ, ហើយទៅយកអ្នកដទៃមកធ្វើជាម្តាយនោះទេ «ខ្ញុំមិនតាំងខ្លួនថាជាម្ដាយឪពុករបស់ប្រជាពលរដ្ឋនោះទេ។ ប៉ុន្តែយើងមានចំណងទាក់ទងជាមួយគ្នាយើងមានការទាក់ទងគ្នាតាំងពីការចេ ញពីរបបប៉ុលពតមករស់ជាមួយគ្នារហូតមកដល់ពេលនេះ»។
យោងតាមសេចក្ដីសម្រេចរបស់នាយករដ្ឋមន្ត្រី សម្ដេចតេជោ ហ៊ុន សែន នៅថ្ងៃទី២៩ ខែមិថុនា ឆ្នាំ២០២២ រាជរដ្ឋាភិបាលកម្ពុជា បានកំណត់យកថ្ងៃអាទិត្យ ទី២៣ ខែមិថុនា ឆ្នាំ២០២៣ ជាកាលបរិច្ឆេទនៃការបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ នៃរដ្ឋសភា។
សម្តេចតេជោ បានហៅការចាកចេញរបស់បងប្អូនពីតំបន់អាទិភាពរមណីយដ្ឋានអង្គរទៅរស់នៅតំបន់អភិវឌ្ឍនេះ ជាការសម្រេចចិត្តដ៏វៃឆ្លាត ដើម្បីទទួលបាននូវកម្មសិទ្ធិដ៏ស្របច្បាប់។
សម្តេចតេជោ ហ៊ុន សែន បានអរគុណចំពោះការយោគយល់របស់ប្រជាពលរដ្ឋយើងដែលមានការយោគយល់ដល់រាជរដ្ឋាភិបាលលើគោលនយោបាយផ្លាស់ប្តូរទីលំនៅរបស់ប្រជាពលរដ្ឋពីតំបន់រមណីយដ្ឋានអង្គរ មករស់នៅតំបន់ពាក់ស្នែងនេះដែលនេះជាការយោគយល់ដល់ជាតិយើងទាំងមូល។
សូមជម្រាបជូនថា ប្រជាពលរដ្ឋដែលស្ម័គ្រចិត្តរើលំនៅដ្ឋានចេញពីតំបន់រមណីយដ្ឋានអង្គរទៅរស់នៅតំបន់អភិវឌ្ឍន៍ពាក់ស្នែង ក៏ទទួលបានគោលនយោបាយឧបត្ថម្ភនានាដូចនឹងប្រជាពលរដ្ឋរស់នៅតំបន់អភិវឌ្ឍនរុនតាឯកផងដែរ។ គោលនយោបាយនោះ មានដូចជាការទទួលបានដីទំហំ ២០ម៉ែត្រ x៣០ម៉ែត្រ, ទទួលបានបណ្ណក្រីក្រកម្រិត១ រួមទាំងហេដ្ឋារចនាសម្ព័ន្ធនានា ឧបត្ថម្ភ គាំទ្ររយៈពេល១០ឆ្នាំ ការទទួលបានបណ្ណសមធម៌សម្រាប់ស្ត្រីចាប់ពីពេលមានផ្ទៃពោះ រហូតដល់កូនអាយុ២ឆ្នាំនិង បានផ្តល់អំណោយជាស្បៀងអាហារ សម្ភារៈប្រើប្រាស់ និងថវិកា ១លាន ៤០ម៉ឺនរៀល ព្រមទាំងសង្កសីចំនួន ៣០សន្លឹកសម្រាប់ធ្វើផ្ទះ។
សម្តេចតេជោ ហ៊ុន សែន ក៏បានណែនាំឱ្យធ្វើបណ្ណកម្មសិទ្ធិដីធ្លីជូនពលរដ្ឋទាំងអស់នេះទាំងនៅតំបន់អភិវឌ្ឍន៍រុនតាឯក និងតំបន់អភិវឌ្ឍន៍ពាក់ស្នែងនេះ៕
ដោយ៖ស តារា
