ភ្នំពេញ៖ បេីយោងតាមប្រភពព័ត៍មានពីរដ្ឋបាលខណ្ឌទួលគោក នៅថ្ងៃទី៣១ ខែតុលា ឆ្នាំ២០២២នេះ បានឱ្យដឹងថា លោក ជា ពិសី អភិបាល នៃគណៈអភិបាលខណ្ឌទួលគោក អញ្ជើញជាអធិបតីបើកការដ្ឋានជួសជុលផ្លូវអ៊ុត កៅស៊ូ AC ៣ខ្សែ និងស្តារលូ ២ខ្សែ ជាគម្រោងអភិវឌ្ឍន៍ខណ្ឌ ឆ្នាំ២០២២ ក្រោយពី ស្ថានភាពហេដ្ឋារចនាសម្ព័ន្ធ ខាងលើ បានទទួលរងការខូចខាត ដែលទាមទារឱ្យមាន ការជួសជុលឡើងវិញ។
ក្នុងពិធីបើកការដា្ឋនគម្រោងអភិវឌ្ឍន៍ខណ្ឌ ឆ្នាំ២០២២នេះដែរ ដោយមានការចូលរួមពី មន្ត្រីរដ្ឋបាលខណ្ឌ សង្កាត់ និងប្រជាពលរដ្ឋ ប្រមាណ ២០០ នាក់ នៅសង្កាត់ទឹកល្អក់ទី៣ ខណ្ឌទួលគោក។
នាឱកាសនោះ លោក ជា ពិសី បានថ្លែងថា ស្ថានភាពហេដ្ឋា រចនាសម្ព័ន្ធ ដូចជាប្រព័ន្ធផ្លូវ និងប្រព័ន្ធលូ មួយចំនួននៅក្នុងភូមិសាស្ត្រខណ្ឌទួលគោក មានការខូចខាត ដែលទាមទារឱ្យមានការជួសជុលឡើងវិញ។ ដើម្បីឆ្លើយតបទៅនឹង បញ្ហាខាងលើនេះ ជារៀងរាល់ឆ្នាំ រដ្ឋបាលខណ្ឌ បានរៀបចំផែនការអភិវឌ្ឈរបស់ខ្លួន ដោយផ្តោតជាសំខាន់ ទៅលើគម្រោងហេដ្ឋារចនាសម្ព័ន្ធ ដូចជាការជួសជុលផ្លូវចាក់អ៊ុត កៅស៊ូ AC ការជួសជុលផ្លូវចាក់បេតុងសរសៃដែក ការជួសជុលដាក់លូថ្មី ការជួសជុល អណ្តូងលូ ដែលមានសភាព ចាស់ទ្រុឌទ្រោម និងការស្ថាលូបង្ហូរទឹកសំអុយជាដើម។
លោកអភិបាលខណ្ឌរូបនេះ បានថ្លែងបន្តថា សម្រាប់ឆ្នាំ២០២២នេះ រដ្ឋបាលខណ្ឌទួលគោក បានលើកគម្រោងជួសជុលផ្លូវអ៊ុតកៅស៊ូ AC ចំនួន ៣ ខ្សែ និងគម្រោងស្តារលូ ផ្លូវចំនួន ២ ខ្សែ និងបានបើកការដ្ឋានជួសជុល និងស្តារលូឡើងវិញ នៅពេលនេះ ដែលក្នុងនោះ រួមមាន៖ ទី១. ការងារជួសជុសផ្លូវអ៊ុតកៅស៊ូ AC ផ្លូវលេខ២៦៥ (ខាងត្បូងផ្សារ សំណង់១២) ប្រវែង ១៤០ម៉ែត្រ ទទឹង ៩ម៉ែត្រ ផ្ទៃក្រឡា ៨៤០ ម៉ែត្រការ៉េ ។ ទី២- ផ្លូវលេខ២៦៥ (ខាងជើងផ្សារសំណង់១២)ប្រវែង៩៥ ម៉ែត្រទទឹង ៩ម៉ែត្រ ផ្ទៃក្រឡា ៥៧០ ម៉ែត្រការ៉េ ស្ថិតក្នុងសង្កាត់ទឹកល្អក់ទី៣ ។ ទី៣ ផ្លូវលេខ៣៦២ ចាប់ពីផ្លូវលេខ ២៥៥ ដល់ផ្លូវលេខ២៦១ស្ទួន ប្រវែង ២០០ ម៉ែត្រ ទទឹង ៩ ម៉ែត្រ ផ្ទៃក្រឡា ១.៨០០ ម៉ែត្រការ៉េ ស្ថិតក្នុងសង្កាត់បឹងសាឡាង។ ស្តារលូ ផ្លូវលេខ២៥៧ ចាប់ពីផ្លូវលេខ ១២៩ ដល់ផ្លូវលេខ២៣០ ប្រវែង ២.១២០ ម៉ែត្រ ស្ថិតក្នុងសង្កាត់ទឹកល្អក់ទី១ សង្កាត់ទឹកល្អក់ទី២ និងសង្កាត់ទឹកល្អក់ទី៣ ។ ផ្លូវលេខ២០២ ចាប់ពីផ្លូវលេខ ២៥៣ ដល់ផ្លូវលេខ ២១៩ ប្រវែង១៩៣២ម៉ែត្រ ស្ថិតក្នុងផ្សារដេប៉ូទី១ សង្កាត់ទឹកល្អក់ទី៣ និងសង្កាត់ផ្សារដើមគរ។
ដើម្បីឱ្យក្រុមហ៊ុនដំណើរការ ការងារខាងលើ ប្រកបដោយភាពរលូន និងអនុវត្តសម្រេចបានតាមផែនការការងារ ដែលបានគ្រោងទុក លោកអភិបាលខណ្ឌ បានស្នើឱ្យ ចៅសង្កាត់ ពាក់ព័ន្ធទាំងអស់ ជួយសហការ ពិសេសផ្សព្វផ្សាយដល់ប្រជាពលរដ្ឋ ដែលមានលំនៅដ្ឋាន ជាប់នឹងការដ្ឋាន ឱ្យបានដឹង និងចូលរួមសហការតាមដាន ការអនុវត្តតម្រោង៕
ដោយ៖សហការី
