ភ្នំពេញ៖ លោកឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បានថ្លែងនៅរសៀលថ្ងៃអង្គារទី០១ ខែវិច្ឆិកា ឆ្នាំ២០២២នេះថា៖ កម្លាំងនគរបាលនៅទូទាំងប្រទេស បានត្រួតពិនិត្យ និងផាកពិន័យយានយន្តសរុបចំនួន ២១១គ្រឿង នាថ្ងៃទី០១ ខែវិច្ឆិកានេះ។ ក្នុងនោះមានម៉ូតូ ១៩៦គ្រឿង និងរថយន្ត ១៥គ្រឿង។
លោកឧត្តមសេនីយ៍ឯក ឆាយ គឹមខឿន បានគូសបញ្ជាក់ថា គិតថ្ងៃទី០១ ខែវិច្ឆិកា ក្នុងឆ្នាំ២០២២នេះ កម្លាំងនគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១៣៤,២៧៨គ្រឿង ក្នុងនោះមានម៉ូតូ ១០៧,៧៥៨គ្រឿង និងរថយន្តគ្រប់ប្រភេទ ២៦,៥២០គ្រឿង។
ជាក់ស្ដែងបទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ គ្មានមួកសុវត្ថិភាព ,ល្មើសសញ្ញា ,ស្រវឹង ,ទូរស័ព្ទ និងអត់ស្លាកលេខជាដើម។ ដោយឡែករថយន្តរួមមាន៖ ល្មើសសញ្ញា អត់ប័ណ្ណបើកបរ ,ខ្សែក្រវ៉ាត់ ,ល្មើសល្បឿន និងអត់ស្លាកលេខជាដើម។
ដោយឡែកសម្រាប់ថ្ងៃទី០១ ខែវិច្ឆិកានេះដែរ យោងតាមរបាយការណ៍របស់នាយកដ្ឋាននគរបាលចរាចរណ៍ បានឱ្យដឹងថា ករណីគ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៥លើក ក្នុងនោះស្លាប់ចំនួន ០២នាក់ របួសចំនួន ០៧នាក់ (របួសធ្ងន់ ០២នាក់)។ រយៈពេល៣០៥ថ្ងៃមានករណីគ្រោះថ្នាក់ចរាចរណ៍ចំនួន ២,៥០២លើក បណ្ដាលឱ្យមនុស្សស្លាប់ ១,៤៥៣នាក់ របួស ៣,៤៥០នាក់ (របួសធ្ងន់ ២,១៨៤នាក់)។
ជាមួយគ្នានោះ លោកអ្នកនាំពាក្យ បានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត៕ដោយ៖ស តារា
