ភ្នំពេញ ៖ រថយន្តសណ្ដោងកុងតឺន័រមួយគ្រឿងបេីកបរក្នុងល្បឿនលឿនខ្វះការប្រុងប្រយ័ត្ន បានរេចង្កួតទៅបុកឡំប្រឺតាចំពីមុខពេញទំហឹងបណ្ដាលឱ្យខូចខាតយ៉ាងដំណំ ហេីយបន្តទៅបុកបង្គោលភ្លេីងបាក់ទ្រេត១ដេីមថែមទៀត បណ្តាលឲ្យរថយន្តក្រឡាប់ផ្ងារជេីងឡេីងលេី និងរបួសធ្ងន់ម្នាក់ បង្កការភ្ញាក់ផ្អេីលកាលពីវេលាម៉ោង៨និង២០នាទីយប់ថ្ងៃទី១៧ ខែវិច្ឆិកា ឆ្នាំ២០២២ នៅតាមបណ្តោយផ្លូវជាតិលេខ១ មុខវត្តចម្ប៉ា ក្នុងភូមិជ្រោយអំពិល១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេបានឃេីញបុរសម្នាក់បេីកបររថយន្តសណ្ដោងកុងតឺន័រមួយគ្រឿងពាក់ផ្លាកលេខភ្នំពេញ 4A-0492 ធ្វេីដំណេីរតាមបណ្តោយផ្លូវជាតិលេខ១ពីលិចទៅកេីតក្នុងល្បឿនយ៉ាងលឿន។ លុះមកដល់ចំណុចកេីតហេតុខាងលេីបានបើកវ៉ាជែងយានយន្តដទៃទៀតមិនប្រយ័ត្នក៏រេចង្កូតទៅខាងឆ្វេងដៃបុកចំពីចំហៀងឡំប្រឺតា ពណ៌ស មួយគ្រឿង ពាក់ស្លាកលេខភ្នំពេញ1HW-2928 ដែលបេីកបរដោយបុរសម្នាក់កំពុងធ្វេីដំណេីរតាមបណ្តោយផ្លូវជាតិលេខ១ពីកេីតទៅលិចបណ្តាលឱ្យរងការខូចខាតស្ទេីរតែទាំងស្រុង និងធ្វេីឱ្យបុរសម្នាក់ជាអ្នកបេីកឡំប្រឺតារងរបួសធ្ងន់ ត្រូវបានរថយន្តសាមុយដឹកបញ្ជូនយកទៅសង្គ្រោះអាយុជីវិត ។
ដោយឡែករថយន្តបង្កហេតុនៅមិនទាន់អស់ល្បឿនក៏បន្តជ្រុលទៅបុកបង្គោលភ្លេីងបាក់ទ្រេតអស់ចំនួន១ដេីមបន្ថែមទៀត និងបណ្តាលឲ្យរថយន្តបង្កក្រឡាប់ផ្ងារជេីងរងការខូចខាតទាំងស្រុង តែតៃកុងរងរបួសស្រាល និងបានចុះចេញពីលេីរថយន្តគេចខ្លួនបាត់ស្រមោលទៅ ។
ក្រោយកេីតហេតុ សមត្ថកិច្ចមូលដ្ឋាន សហការជាមួយមន្ត្រីជំនាញចរាចរណ៍ធ្វេីការវាស់វែង និងស្ទួចយករថយន្តបង្កនិងឡំប្រឺតាទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដេីម្បីរងចាំដោះស្រាយគ្នានៅពេលក្រោយ ៕ 
ដោយ ៖ ភារ៉ា ដង្កោ
