ខេត្តតាកែវ៖ បេីយោងតាមប្រភពព័ត៌មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងនៅព្រឹកថ្ងៃពុធទី២៣ ខែវិច្ឆិកា ឆ្នាំ២០២២នេះថា៖ សំណាកគំរូគ្រឿងសមុទ្រស្រស់ ស្ពៃជ្រក់ ត្រីប្រឡាក់ និងគ្រឿងឧបភោគបរិភោគផ្សេងទៀតត្រូវបានមន្រ្តី ក.ប.ប. ប្រចាំនៅខេត្តព្រះសីហនុ ខេត្តកំពង់ធំ និងខេត្តតាកែវយកមកធ្វើតេស្តបឋម នៅលើរថយន្តមន្ទីរពិសោធន៍ចល័តផ្នែកម្ហូបអាហារ ដើម្បីស្វែងរកក៏ដូចជាការពារក្រែងមានការលាយសារធាតុគីមីហាមឃាត់នានា ដែលអាចបណ្តាលឱ្យគ្រោះថ្នាក់ដល់សុខភាពអ្នកប្រើប្រាស់។
ប្រភពដដែលបន្តថា ការត្រួតពិនិត្យទាំងនោះត្រូវបានធ្វើឡើងនៅតាមទីផ្សារសំខាន់ៗ ផ្ទះលក់ទំនិញនានា ក្នុងបេសកកម្មរបស់មន្ត្រីជំនាញ ចាប់ពីថ្ងៃទី១៧-១៨ និងថ្ងៃទី២១ ខែវិច្ឆិកា ឆ្នាំ២០២២។
យោងតាមលទ្ធផលនៃការត្រួតពិនិត្យ មន្ត្រីយើងពុំបានរកឃើញវត្តមានសារធាតុគីមីហាមឃាត់នៅលើទំនិញហូបចុកទាំងនោះទេ យ៉ាងណាមិញមន្ត្រីជំនាញពិនិត្យឃើញទំនិញចម្រុះខូចគុណភាព ហួសកាលបរិច្ឆេទប្រើប្រាស់សរុបចំនួន ៣៩.៧៤គីឡូក្រាម។
គួរជម្រាបថា ក្រោយប្រតិបត្តិការចប់ទំនិញទាំងនោះត្រូវបានយកមករក្សាទុកនៅទីស្នាក់ការសាខា ហើយម្ចាស់ទំនិញត្រូវរងការពិន័យអន្តរការណ៍ពីមន្ត្រីជំនាញដើម្បីជាការអប់រំ៕
ដោយ៖សហការី
