ខេត្តពោធិ៍សាត់៖ ដោយសារតែការធ្វេសប្រហែសរបស់អាណាព្យាបាលចំពោះកុមារតូចៗ បានធ្វេីឱ្យក្មេងប្រុសអាយុទើបតែ ២ឆ្នាំបានលង់ទឹកស្លាប់យ៉ាងអាណោចអាធ័ម បង្កការភ្ញាក់ផ្អើលដល់ប្រជាពលរដ្ឋ និងកម្លាំងសមត្ថកិច្ចមូលដ្ឋានចុះមកត្រួតពិនិត្យជាក់ស្ដែង។ នេះបេីយោងតាមប្រភពព័ត៍មានពីរបាយការណ៍របស់ អគ្គស្នងការដ្ឋាននគរបាលជាតិ បានឱ្យដឹងនៅរសៀលថ្ងៃព្រហស្បតិ៍ទី២៤ ខែវិច្ឆិកា ឆ្នាំ២០២២។
បេីតាមរបាយការណ៍របស់អធិការដ្ឋាននគរបាលស្រុកបាកាន បានឱ្យដឹងថា៖ មានករណីក្មេងប្រុសម្នាក់បានលង់ទឹកផែស្លាប់ក្រោយម្ដាយទុកចោល ដោយហេតុការណ៍នេះកើតឡើងកាលពីថ្ងៃទី២៣ ខែវិច្ឆិកា ឆ្នាំ២០២២ វេលាម៉ោង១១និង៣០នាទី នៅចំណុចផែរបស់ជនរងគ្រោះ ស្ថិតនៅភូមិដីរនាត ឃុំមេទឹក ស្រុកបាកាន ខេត្តពោធិ៍សាត់។
នគរបាលស្រុកបាកាន បន្តថា សពជនរងគ្រោះមានឈ្មោះ ដូង ជីវ័ន្ត ភេទប្រុស អាយុ២ឆ្នាំ មានទីលំនៅភូមិដីរនាត ឃុំមេទឹក ស្រុកបាកាន ខេត្តពោធិ៍សាត់។ ឪពុកឈ្មោះ ថៃ ដូង ភេទប្រុស អាយុ៣៤ឆ្នាំ -ម្ដាយឈ្មោះ ហេង ហួច ភេទស្រី អាយុ៣៣ឆ្នាំ អ្នកទាំងពីររស់នៅភូមិឃុំកើតហេតុលើ។
យោងតាមការបំភ្លឺរបស់ម្ដាយជនរងគ្រោះបានឲ្យដឹងថា ខ្លួនបានទុកកូនចោលនៅខាងមុខផែហើយខ្លួនទៅដាំបាយនៅខាងក្រោយផែ ពេលត្រឡប់មករកកូនវិញកូនបានធ្លាក់ទឹកបាត់ទៅហើយ ម្តាយឪពុកជនរងគ្រោះបានរកអ្នកជិតខាងចុះរាវរកកូនរហូតមកដល់ម៉ោង១២និង១០ទើបរកសាកសពជនរងគ្រោះឃើញពេលនោះជនរងគ្រោះបានស្លាប់បាត់ទៅហើយ។
បច្ចុប្បន្នសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារ ដើម្បីធ្វើបុណ្យទៅតាមប្រពៃណី៕ដោយ៖សហការី