ព្រិលនឹងបន្តធ្លាក់ក្នុងទីក្រុងគៀវ រហូតដល់ពាក់កណ្តាលសប្តាហ៍ក្រោយ ខណៈដែលសីតុណ្ហភាព ត្រូវបានគេព្យាករថា នឹងធ្លាក់ក្រោមសូន្យអង្សាសេ។

ទីភ្នាក់ងារសារព័ត៌មាន Reuters នៅថ្ងៃទី២៧ ខែវិច្ឆិកាបានផ្សាយថា ព្រិលធ្លាក់ខ្លាំងត្រូវបានគេរំពឹងថានឹងចាប់ផ្តើមនៅក្នុងទីក្រុងគៀវ ដោយសីតុណ្ហភាពធ្លាក់ចុះក្រោមសូន្យអង្សាសេ ទាំងថ្ងៃទាំងយប់ ខណៈដែលមនុស្សរាប់លាននាក់ រស់នៅក្នុងនិងជុំវិញរដ្ឋធានីអ៊ុយក្រែន មានម៉ាស៊ីនកម្តៅ ។
ប្រតិបត្តិករបណ្តាញអគ្គិសនី Ukrenergo នៃប្រទេសអ៊ុយក្រែនបាននិយាយថា ក្រុមហ៊ុនផលិតអគ្គិសនីរបស់ប្រទេសនេះ អាចបំពេញតម្រូវការបាន ត្រឹមតែ បីភាគបួនប៉ុណ្ណោះ ចាំបាច់ត្រូវកំណត់និងកាត់ផ្តាច់ ចរន្តអគ្គិសនីទូទាំងប្រទេស។ យោងតាម Ukrenergo ការដាច់ចរន្តអគ្គិសនីនឹងបន្ត ហើយអំពាវនាវ ឱ្យមានការរឹតបន្តឹងលើការប្រើប្រាស់អគ្គិសនីមិនចាំបាច់។
លោក Sergey Kovalenko នាយកប្រតិបត្តិនៃក្រុមហ៊ុន YASNO ដែលជាក្រុមហ៊ុនផ្គត់ផ្គង់ថាមពល របស់ទីក្រុងគៀវ មានប្រសាសន៍ថា ស្ថានភាពនៅក្នុងទីក្រុងមានភាពប្រសើរឡើង ប៉ុន្តែនៅតែមាន ការលំបាកខ្លាំង។ YASNO គឺជាក្រុមហ៊ុនចែកចាយ ស្ថិតនៅក្នុងក្រុមហ៊ុន DTEK ដែលជាក្រុមហ៊ុនផ្គត់ផ្គង់ថាមពលឯកជន ធំបំផុតរបស់អ៊ុយក្រែន។
ប្រធានាធិបតីអ៊ុយក្រែនលោក Volodymyr Zelensky បាននិយាយថា មនុស្ស ៦លាននាក់គ្មានអគ្គិសនី កាលពីថ្ងៃចន្ទ បន្ទាប់ពីការទម្លាក់គ្រាប់បែក ចុងក្រោយរបស់រុស្ស៊ីកាលពីសប្តាហ៍មុន ដែលបណ្តាលឱ្យមានការខូចខាតធ្ងន់ធ្ងរបំផុត របស់អ៊ុយក្រែនរហូតមកដល់បច្ចុប្បន្ន ដោយបន្សល់ទុក មនុស្សរាប់លាននាក់គ្មានទឹក និង អគ្គិសនីសម្រាប់ដុតកំដៅក្នុងរដូវរងា៕ ដោយធីរីណា

រូប​ថត​ :​REUTERS​