ភ្នំពេញ : ក្រោមទិដ្ឋភាពដ៏សែនមនោរម្យ ប្រកបដោយភាពរីករាយនារាត្រីនេះលោក ហ៊ុន ម៉ានី ប្រធាន ស.ស.យ.ក. បានថ្លែងថា ការជួបជុំគ្នានៃសមាជិកសមាជិកា នារាត្រីនេះគឺជាការបង្ហាញអោយឃើញពីស្មារតីនៃការសាមគ្គីភាព ឯកភាពគ្នាជាធ្លុងមួយ ដើម្បីចូលរួមអបអរសាទរនូវសមិទ្ធផលនានាដែល ស.ស.យ.ក. សម្រេចបាន ក្នុងរយៈពេល៤៤ ឆ្នាំកន្លងមកនេះ។
លោកបានបន្តថា ការជួបគ្នារបស់ សមាជិក សមាជិកា ស.ស.យ.ក. នៅវិមានឈ្នះៗនេះគឺជាការបង្ហាញអ្វីដែលជានិមិត្តរូបនៃស្មារតីខ្មែរ ការបង្រួមបង្រួបជាតិ ការរួបរួមគ្នា ដើម្បីការអភិវឌ្ឍជាតិលើគ្រប់វិស័យ និងជាស្មារតីដ៏រឹងមាំសម្រាប់សមាជិក សមាជិកា ស.ស.យ.ក. ក្នុងការត្រៀមខ្លួនទាំងកម្លាំងកាយចិត្ត ចូលរួមគាំទ្រសុខុដុមរមនា ឯករាជ្យ អធិបតេយ្យភាព របស់ប្រទេសកម្ពុជា ជាពិសេសបន្តជំរុញប្រទេសកម្ពុជាអោយក្លាយជាកន្លែងសម្រាប់វិនិយោគ និងរក្សាស្ថេរភាពសម្រាប់ប្រទេស ក្រោយការរីករាលដាល នៃវិបត្តិកូវីដ-១៩ និងបន្តផ្តល់ឱកាសដល់យុវជនដើម្បីចូលរួមជាមួយសង្គមបន្ថែមទៀត។
សូមជម្រាបថា ការប្រគុំតន្រ្តីអបអរសាទរខួបលើកទី៤៤ នៃកំណើតសហភាពសហព័ន្ធយុវជនកម្ពុជាបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នារាត្រីថ្ងៃទី ០៣ ខែធ្នូ ឆ្នាំ២០២២ នៅវិមានអនុស្សាវរីយ៍នយោបាយឈ្នះ ឈ្នះ។ កម្មវិធីនេះមានការអញ្ជើញចូលរួមពីសមាជិក សមាជិកា គណៈអចិន្រ្តៃយ៍នៃគណៈកម្មាធិការកណ្តាល សមាជិក សមាជិកា ស.ស.យ.ក. ទូទាំងប្រទេស សិល្បករ សិល្បការិនីល្បីៗជាច្រើនរូប និងសាធារណជនយ៉ាងច្រើនកុះករ ៕
ដោយ : សិលា
