ភ្នំពេញ ៖ បុរសជាជនជាតិចិនម្នាក់ និងអ្នករួមដំណើរម្នាក់ទៀតបានបើករថយន្តយ៉ាងលឿនជ្រុលទៅបុកឡំប្រឺតាមួយគ្រឿងបណ្ដាលឱ្យក្រឡាប់រងការខូចខាតយ៉ាងដំណំ និងធ្វេីឱ្យបុរសម្នាក់និងស្រ្តីម្នាក់រងរបួសធ្ងន់ កាលពីវេលាម៉ោង១រំលងអធ្រាត្រឈានចូលថ្ងៃអាទិត្យ ទី៤ ខែធ្នូ ឆ្នាំ២០២២ នៅចំណុចមុខការាសសាំងតូតាល់ ជិតផ្សារសិនជូរីផ្លាហ្សា តាមបណ្តោយផ្លូវសហព័ន្ធរុស្សុី ក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីកន្លែងកេីតហេតុបានឱ្យដឹងថា ដំបូងឡើយគេឃើញឡំប្រឺតាមួយគ្រឿង ពណ៌ក្រហម ពាក់ផ្លាកលេខភ្នំពេញ1GV.2902 បើកដោយបុរសម្នាក់និងស្ត្រីម្នាក់រួមដំណើរជាមួយ បើកតាមបណ្តោយផ្លូវសហព័ន្ធរុស្សុីពីលិចទៅកើតក្នុងល្បឿនមធ្យម ខណៈមកដល់ចំណុចកើតហេតុខាងលើពេលកំពុងតែបើកសុខៗក៏ស្រាប់តែមានរថយន្តម៉ាក Tacoma ពណ៌ស ស៊េរីឆ្នាំ២០១០ ពាក់ផ្លាកលេខភ្នំពេញ2BE.5826បើកបរដោយបុរសម្នាក់និងរួមដំណើរដោយបុរសម្នាក់ទៀតជាជនជាតិចិន បើកតាមបណ្ដោយផ្លូវសហព័ន្ធរុស្សុីពីលិចទៅកើតស្របគ្នាយ៉ាងលឿនមកបុកឡំប្រឺតាពីក្រោយយ៉ាងពេញទំហឹង បណ្ដាលឱ្យក្រឡាប់ឡំប្រឺតាគាបជាប់ស្រ្តីដែលជិះខាងក្រោយ និងខ្ទាតអ្នកបើកចេញពីឡំប្រឺតាបោកក្បាលនឹងថ្នល់រងរបួសធ្ងន់ទាំងពីរនាក់ ។ ភ្លាមៗនោះប្រជាពលរដ្ឋនាំគ្នាជួយលើកឡំប្រឺតានិងគាស់យកស្រ្តីអ្នកដំណើរចេញមកក្រៅ រួចទាក់ទងរថយន្តសាមុយមកដឹកយកទៅសង្គ្រោះអាយុជីវិត ដោយឡំប្រឺតានិងរថយន្តបង្កបានរងការខូចខាតយ៉ាងដំណំ។
ក្រោយកេីតហេតុភ្លាមៗអ្នកបើករថយន្តបង្កហេតុត្រូវបានសមត្ថកិច្ចឃាត់ខ្លួនយកទៅប៉ុស្តិ៍នគរបាលរដ្ឋបាលកាកាបទី១ ដើម្បីសួរនាំនិងចាត់ការតាមនីតិវិធី ។ ដោយឡែករថយន្តបង្កនិងឡំប្រឺតា ត្រូវបានសមត្ថកិច្ចជំនាញចុះមកធ្វេីការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដេីម្បីដោះស្រាយគ្នានៅពេលក្រោយ ៕
ដោយ ៖ ភារ៉ា ដង្កោ
