ខេត្តស្វាយរៀង ៖ មានការតវ៉ាជាច្រើនលើកច្រើនសារពីប្រជាពលរដ្ឋនៅឃុំចំនួនបី ដែលជាអតិថិជនរបស់អគ្គិសនីក្រោលគោ ពាក់ព័ន្ធនិងបញ្ហាដែលអាជ្ញាធរអគ្គិសនីកម្ពុជា បានផ្តល់ពាក្យសន្យាជាមួយប្រជាពលរដ្ឋទាំងនោះកាលពីថ្ងៃទី២៥ ខែឧសភា ឆ្នាំ២០១៥ថា នៅក្នុងខែមិនា ឆ្នាំ២០១៦ ហ្នឹងមានការបញ្ចុះតម្លៃដោយគ្មានលក្ខ័ណ ពីតម្លៃ ១០០០រៀលក្នុងមួយគីឡូវ៉ាត់ម៉ោង មកត្រឹមតែ ៨០០រៀល ក្នុងមួយគីឡូវ៉ាត់ម៉ោងនិងទាមទារឱ្យអាជ្ញាធរអគ្គិសនីចេញមុខមកបកស្រាយដោយផ្ទាល់ជាមួយប្រជាពលរដ្ឋអំពីពាក្យសន្យាទាំងនោះ ថាតើវាជាការសន្យាខ្យល់ឬមួយយ៉ាងណា? ។
នៅព្រឹកថ្ងៃទី៣០ ខែឧសភា ឆ្នាំ២០១៦ ក្នុងកម្មវិធីវេធិការសារធារណៈដែលរៀប ចំដោយលោកអភិបាលស្រុកស្វាយជ្រំដែលមានការចូលរួមជាអធិបតីភាព ពីសំណាក់ ឯកឧត្តមអភិបាលរងខេត្តនៅវត្តក្រោលគោ ដែលស្ថិតក្នុងឃុំក្រោលគោ ស្រុកស្វាយជ្រំ ខេត្តស្វាយរៀង អាជ្ញាធរអគ្គិសនីកម្ពុជាបានបញ្ជូនតំណាងរបស់ខ្លួន ឱ្យមកចូលរួមធ្វើបកស្រាយដោយផ្ទាល់អំពីបញ្ហាទាំងនោះជូនប្រជាពលរដ្ឋទាំងអស់ឱ្យបានអស់ចម្ងល់ ។
លោក ឃុន ពិសិដ្ឋ ប្រធានផ្នែកបញ្ជីរថ្លៃលក់នៃនាយកដ្ឋានអាជ្ញាធរអគ្គិសនីកម្ពុជា បានថ្លែងមកកាន់ប្រជាពលរដ្ឋទាំងអស់ដែលបានចូលរួមថា ចំពោះការសន្យារបស់មន្ត្រីអាជ្ញាធរអគ្គិសនីកម្ពុជា ដែលបានសន្យាជាមូយនិងបងប្អូនទាំងអស់ថា និងមានការបញ្ចុះតម្លៃមកត្រឹម ៨០០រៀលក្នុងមួយគីឡូវ៉ាត់ម៉ោង នៅក្នុងខែមិនា ឆ្នាំ២០១៦នោះ គឺជាការយល់ច្រឡំរបស់ខាងមន្ត្រីយើងដោយអ្នកមកផ្សព្វផ្សាយលើកមុន មិនបានបកស្រាយឱ្យប្រជាពលរដ្ឋយល់ឱ្យបានច្បាស់អំពីដំណាក់កាលនៃការបញ្ចុះតម្លៃរបស់អាជ្ញាធរអគ្គិសនី ។ លោក ឃុន ពិសិដ្ឋ បានបញ្ជាក់ថា ការបញ្ចុះមកត្រឹម ៨០០រៀលនេះ គឺអាចធ្វើបានរហូតទាល់តែខេត្តស្វាយរៀង មានអនុស្ថានីយបណ្តាញជាតិមួយរបស់ខ្លួនផ្ទាល់ ទើបមានការបញ្ចុះតម្លៃបានដែលអនុស្ថានីនេះគ្រោងនិងដាក់ឱ្យដំណើរកាលនៅក្នុងឆ្នាំ២០១៧ ខាងមុខនេះ ។
ជាមួយគ្នានេះដែរ នៅពេលដែលប្រជាពលរដ្ឋដែលបានចូលរួមទាំងអស់ នៅពេលបានលឺលោក ឃុន ពិសិដ្ឋ បកស្រាយថា ការសន្យារបស់អាជ្ញាធរអគ្គិសនី ដែលមកជួបលើកមុន គឺជាការយល់ច្រឡំ នោះ ប្រជាពលរដ្ឋជាង ៨០% បាននាំគ្នាឡើងម៉ូតូរៀងៗខ្លួនត្រឡប់ទៅកាន់គេហដ្ឋានវិញ ដែលនៅសល់តែមួយចំនួនតូចប៉ុណ្ណោះនៅបន្តស្តាប់ ។
ជាចុងក្រោយ តំណាងអាជ្ញាធរអគ្គិសនីកម្ពុជាបានបញ្ជាក់ថា ចាប់ពីខែមិថុនា តម្លៃអគ្គិសនីក្រោលគោអាចបញ្ចុះបានមកត្រឹមតែ ៩៥០រៀល ក្នុងមួយគីឡូវ៉ាត់ម៉ោង នេះបើយោងទៅតាមការសិក្សានៃថ្លៃដើម និងថ្លៃលក់របស់អគ្គិសនីក្រោលគោនាពេលបច្ចុប្បន្ន ។ ដោយឡែកនៅពេលដែល អនុស្ថានីយបណ្តាញជាតិនៅក្នុខេត្តស្វាយរៀងបានកសាងរួច និងមានការបញ្ចុះតម្លៃមកត្រឹម ៨០០រៀល ក្នុងមួយគីឡូវ៉ាត់ម៉ោងបាន ។
ដោយឡែកបើតាមតំណាងអគ្គិសនីក្រោលគោបានឱ្យដឹងថា ខ្លួននិងអនុវត្តន៍ទៅតាមសេចក្តីជូនដំណឹងរបស់អាជ្ញាធរអគ្គិសនីកម្ពុជា ដែលចេញនៅថ្ងៃទី២៥ ខែឧសភា ឆ្នាំ២០១៦ ដែលឱ្យយកតម្លៃត្រឹមតែ ៩៥០រៀល ក្នុងមួយគីឡូវ៉ាត់ម៉ោង ។ ប្រភបបានបញ្ជាក់ថា អគ្គិសនីក្រោលគោហ្នឹងចាប់ផ្តើមផ្តាច់ផងចរន្តអគ្គិសនីចាប់ពី មិថុនានេះទៅ ចំពោះអ្នកមិនបានបង់ប្រាក់ជំពាក់កាលពីខែកន្លងទៅ។
សូមបញ្ជាក់ថា ការមកចូលរួមស្តាប់ការបកស្រាយរបស់ប្រជាពលរដ្ឋទាំងអស់នៅក្នុងវត្តស្វាយជ្រំនៅក្នុងលើកនេះ ឃើញថា ពួកគាត់បានទិញក្បាលជ្រូក ផ្លែឈើ និងភេសជ្ជៈមួយចំនួន មកជាមួយ ដែលពួកគាត់បានបញ្ជាក់ថា មួលហេតុដែលពួកគាត់ទិញរបស់ទាំងនោះយកមកជាមួយ គឺក្នុងគោលបំណងឱ្យអាជ្ញាធរអគ្គិសនីកម្ពុជា និងអ្នកពាក់ព័ន្ធទាំងអស់ ចូលរួមស្បថនៅខាងមុខព្រះជាមួយគ្នាថា តើកាលពីថ្ងៃទី២៥ ខែឧសភា ឆ្នាំ២០១៥ តំណាងអគ្គិសនីកម្ពុជា បានផ្តល់ពាក្យសន្យាបែបនេះជាមួយគាត់ដែរ រឺទេ ? តែចុងក្រោយពួកមានតែខកចិត្តឡប់ទៅវិញ ដោយអ្នកដែលបានសន្យាជាមួយពួកគាត់មិនបានមកជួបវិញ ហើយអ្នកក្រោលបែរជានិយាយថា នេះជាការយល់ច្រឡំទៅវិញ ៕
ដោយ៖យឹម សុថាន
