ខេត្តកោះកុង៖ បេីយោងតាមប្រភពព័ត៍មានពីរបាយការណ៍របស់អធិការដ្ឋាននគរបាលស្រុកមណ្ឌលសីមា នៅព្រឹកថ្ងៃពុធទី០៧ ខែធ្នូ ឆ្នាំ២០២២នេះ បានឱ្យដឹងថា៖ កម្លាំងជំនាញ បានធ្វេីការស្រាវជ្រាវចាប់ឃាត់ខ្លួនជនដៃដល់ម្នាក់ ក្នុងចំណោមបក្ខពួកពីរនាក់ បន្ទាប់ពីទំនាស់ពាក្យសម្តីពេលផឹកស៊ីជាមួយ រួចធ្វេីសកម្មភាពបានយកដែកទីបជ្រុងវាយទៅលើ ជនរងគ្រោះ បណ្តាលឱ្យរងរបួសចំក្បាល ។
ប្រភពដដែលបន្តថា ករណីហឹង្សា ដោយចេតនាប្រើដោយអាវុធ ( ដែកទីបជ្រុង ) បានកើតឡើងកាលពីយប់ថ្ងៃទី០៦ ខែធ្នូ ឆ្នាំ២០២២ វេលាម៉ោង ២០និង០០នាទី នៅចំណុចភូមិ ចាំយាម ឃុំប៉ាក់ខ្លង ស្រុកមណ្ឌលសីមា។
សមត្ថកិច្ចនគរបាល បានបន្តថា ជនដៃដល់ដែលត្រូវឃាត់ខ្លួននោះឈ្មោះ សាយ ថៃ ភេទ ប្រុស អាយុ ៣១ ឆ្នាំ មានទីលំនៅ ភូមិ ចាំយាម ឃុំ ប៉ាក់ខ្លង មុខរបរ កម្មករ ។ ចណែកជនសង្ស័យម្នាក់ទៀតឈ្មោះ សុខ តើម ភេទ ប្រុសអាយុ ២១ ឆ្នាំ មានទីលំនៅភូមិ ចាំយាម ឃុំ ប៉ាក់ខ្លង (រត់គេចខ្លួនបាត់)។រីឯជនរងគ្រោះឈ្មោះ ជន់ ជា ភេទ ប្រុស អាយុ ៤៧ ឆ្នាំ មុខរបរ កម្មករ មានទីលំនៅភូមិ ចាំយាម ឃុំ ប៉ាក់ខ្លង (រងរបួសស្រាល)។
សូមជម្រាបថា ជនសង្ស័យទាំងពីរនាក់ បានយកដែកទីបជ្រុងវាយចំក្បាល និងទាត់ដួលទៅដី។ មូលហេតុ បង្ករឡើងដោយទំនាស់ពាក្យសម្តីពេលផឹកស៊ីជាមួយគ្នា ។
បច្ចុប្បន្ន កម្លាំងនគរបាល បានឃាត់ខ្លួនជនសង្ស័យ និងបំពេញសំណុំរឿងបញ្ជូន ទៅផែនការងារព្រហ្មទណ្ឌខេត្តចាត់ការបន្ត៕
ដោយ៖សហការី
