ខេត្តព្រះសីហនុ៖ ជនសង្ស័យ២នាក់ ពាក់ព័ន្ធករណីគ្រឿងញៀន ត្រូវបានកម្លាំងនគរបាលនៃអធិការដ្ឋានស្រុកព្រៃនប់ បានចុះស្រាវជ្រាវរហូតឈានដល់ការបង្ក្រាបឃាត់ខ្លួន រួមនឹងវត្ថុតាងជាគ្រឿងញៀនមួយចំនួន។ នេះបេីយោងតាមប្រភពព័ត៍មានពីរបាយការណ៍របស់ស្នងការដ្ឋាននគរបាលខេត្តព្រះសីហនុ បានឱ្យដឹងនៅរសៀលថ្ងៃសៅរ៍ទី៣១ ខែធ្នូ ឆ្នាំ២០២២។
ជនសង្ស័យទាំង០២នាក់មានឈ្មោះ ភឹម សុដា ហៅខ្មៅ ភេទប្រុស អាយុ៣១ឆ្នាំ មុខរបរមិនពិតប្រាកដ មានទីលំនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ និងឈ្មោះ សែត វៃ ភេទប្រុស អាយុ២០ឆ្នាំ មុខរបរកម្មកររោងចក្រ មានទីលំនៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
របាយការណ៍ដដែលបន្តថា ដោយមានការដឹកនាំបញ្ជាពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងជំនាញអធិការដ្ឋាននគរបាលស្រុកព្រៃនប់ កាលពីថ្ងៃទី៣០ ខែធ្នូម្សិលមិញនេះ បានចុះបង្ក្រាបគ្រឿងញៀន០១ករណី ដោយឃាត់ខ្លួនជនសង្ស័យបានចំនួន ០២នាក់ នៅចំណុចអូរប្រៃ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
ដកហូតវត្ថុតាងរួមមាន ៖ -ម្សៅក្រាមសថ្លាសង្ស័យសារធាតុញៀនចំនួន ៣៩កញ្ចប់ -ទូរស័ព្ទដៃចំនួន ០៣គ្រឿង -ថង់សំរាប់វិចខ្ចប់មួយចំនួន ។ បច្ចុប្បន្ន កម្លាំងជំនាញបានកសាងសំណុំរឿងអនុវត្តបន្តតាមនីតិវិធី ៕ដោយ៖អារុណរះ
