ខេត្តកំពង់ធំ៖ យោងតាមរបាយការណ៍របស់អធិការស្រុកស្ទោងស្ដីពីករណីឃាតកម្មមួយបានកើតឡើងដោយការបាញ់និងកាំភ្លើងកែឆ្នៃកាលពីថ្ងៃទី២ ខែមករា ឆ្នាំ២០២៣ វេលាម៉ោង១៩និង៣០នាទី ស្ថិតនៅភូមិកំព្រាល ឃុំប្រឡាយ ស្រុកស្ទោង ខេត្តកំពង់ធំ។ ប្រភព ខាងលើបានឱ្យដឹងថា ជនរងគ្រោះឈ្មោះ ម៉ៅ មាន ភេទប្រុស អាយុ៣៧ឆ្នាំ មានទីលំនៅភូមិកំព្រាល ឃុំ ប្រឡាយ ស្រុកស្ទោង មានរបួស៣កន្លែង លើទ្រូងខាងស្ដាំមួយកន្លែង និង បែកលើថ្ងាស២កន្លែង។ រីឯ ជនសង្ស័យ ឈ្មោះ ជន សេង ហ៊ាង ភេទប្រុស អាយុ ៣២ឆ្នាំ នៅភូមិកំព្រាល ឃុំប្រឡាយ ស្រុកស្ទោង ត្រូវឃាត់ខ្លួនភ្លាមៗក្រោយកើតហេតុ។

តាមការបញ្ជាក់របស់ប្រពន្ធជនរងគ្រោះបានឲ្យដឹងថា នៅមុនពេលកើតហេតុ ជនសង្ស័យបានផឹកស្រាស្រវឹង ប្រើហឹង្សាវាយប្រពន្ធកូន ហើយប្រពន្ធនិងកូនបានរត់ ចេញពីផ្ទះ ធ្វើអោយជនសង្ស័យខឹងនិងតាមរករហូត ដល់ផ្ទះ ជនរងគ្រោះដែលជាបងថ្លៃ។ ពេលនោះក៏ទាស់ ពាក្យសំដីនិងគ្នា និងបានវាយតប់គ្នាទៅវិញទៅមក។

ពេលនោះជនសង្ស័យបាននិយាយថា ឯងតែប៉ុណ្ណេះដឹងថាមិនរស់ទេ។ ថាហើយជនសង្ស័យ ក៏ជិះម៉ូតូចេញទៅផ្ទះខ្លួនមួយសន្ទុះក៏បានត្រឡប់មកម្ដងទៀតនិងបានវាយតប់គ្នាជាមួយជនរងគ្រោះម្តងទៀត។ ពេលនោះជនសង្ស័យបាន ទាញកាំភ្លើងកែឆ្នៃបាញ់សំដៅមកជន រងគ្រោះចំទ្រូងខាងស្ដាំ១គ្រាប់បណ្តាលអោយរបួសធ្ងន់ហើយបានស្លាប់នៅមន្ទីរពេទ្យបង្អែកស្ទោង។

លោក យ៉ងសំ អធិការស្រុកស្ទោងបានឲ្យដឹងថាជន សង្ស័យត្រូវបានឃាត់ខ្លួនបញ្ចូនមកអធិការដ្ឋាននគរបាលស្រុកស្ទោងនិងត្រៀមបញ្ជូនទៅស្នងការខេត្តកំពង់ធំរសៀលថ្ងៃនេះ។ ចំណែកជនរងគ្រោះត្រូវបានក្រុមគ្រួសារចាត់ចែងធ្វើបុណ្យតាមប្រពៃណី៕ ដោយ៖ សូរិយា