ភ្នំពេញ៖ ជនសង្ស័យ២នាក់ ត្រូវកម្លាំងនគរបាលប៉ុស្តិ៍ផ្សារដេប៉ូទី១ស្រាវជ្រាវឃាត់ខ្លួនបានជាបន្តបន្ទាប់ ខណៈដែលជនសង្ស័យបានធ្វើសកម្មភាពគាស់ផ្ទះលួចយកគ្រឿងបន្លាស់រថយន្ត បានជាច្រើនហើយគេចខ្លួនបាត់ លុះព្រឹកឡើងបក្ខពួកជនសង្ស័យម្នាក់បានយកមកលក់វិញ ក៏ត្រូវឃាត់ខ្លួនតែម្តង ។
ករណីឃាត់ខ្លួនជនសង្ស័យទាំង២នាក់ខាងលើនេះ បានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី០៣ ខែមិថុនា ឆ្នាំ២០១៦ នៅចំនុចផ្ទះលេខ៨៥ ផ្លូវលេខ១៥៦ ក្រុមទី៧ ភូមិ៨ សង្កាត់ផ្សារដេប៉ូទី១ ខណ្ឌ ទួលគោក រាជធានីាភ្នំពេញ ។
ជនសង្ស័យទាំង០២នាក់ដែលត្រូវឃាត់ខ្លួននោះ ទី១-ឈ្មោះ សុខ បូរ៉ា ហៅ រ៉ា ភេទប្រុស អាយុ ២៣ឆ្នាំ ជនជាតិខ្មែរ មុខរបរ រើសអេតចាយ ស្នាក់នៅផ្ទះជួល ផ្លូវលំ ភូមិទ្រា២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ,ទី២ឈ្មោះ អ៊ំ សីហា ភេទប្រុស អាយុ ២១ឆ្នាំ ជនជាតិ ខ្មែរ មុខរបរមិនពិតប្រាកដ ស្នាក់នៅផ្ទះគ្មានលេខ ភូមិ ត្រពាំងសុពណ៌ សង្កាត់គោករការ ខណ្ឌពោធិ៍សែនជ័យ រាជធានីភ្នំពេញ។ រីឯជនរងគ្រោះឈ្មោះ ភាព ចាន់ថន ភេទប្រុស អាយុ៤១ឆ្នាំ ជនជាតិខ្មែរ មុខរបរលក់គ្រឿងបន្លាស់រថយន្ត ស្នាក់នៅផ្ទះលេខ៧២អា ផ្លូវលេខ២២៥ សង្កាត់ផ្សារ ដេប៉ូទី១ ខណ្ឌទួលគោក ។ សំភារះដែលបាត់បង់មាន៖ ម៉ូតូមួយគ្រឿងម៉ាកគុបជ្រុង សេ៥០ ពណ៌ខៀវចាស់ គ្មានពាក់ស្លាកលេខ; ឌីណាម៉ូរថយន្ត ៤០គ្រាប់ និងម៉ូប៊ីន ១០០គ្រាប់ ;ប័ណ្ណសំគាល់ម៉ូតូ០១សន្លឹក ,ធុងទឹករថយន្ត០២ និង សំបកកង់រថយន្ត ចំនួន០២គ្រាប់ ។
ក្រោយកើតហេតុ ជនរងគ្រោះបានទូរស័ព្ទប្រាប់បងប្អូនឲ្យជួយមើលតាមឃ្លាំង ក្រែងមានអ្នកណាយកឌីណាម៉ូ និងម៉ូប៊ីនរថយន្តមកលក់ ហើយលុះដល់ម៉ោងឃាត់ខ្លួន ស្រាប់តែ ជនសង្ស័យទី២ឈ្មោះ អ៊ុ សីហា បានយកម៉ូប៊ីនរថយន្តមកលក់ នៅចំណុចផ្លូវលេខ២០២ សង្កាត់ផ្សារដេប៉ូទី១ ម្តុំផ្ទះជនរងគ្រោះ ក៏រាយការណ៍ប្រាប់សមត្ថកិច្ចមូលដ្ឋាន ឃាត់ខ្លួនបានម្នាក់ យកមកសាកសួរ ទើបធ្វើការស្រាវជ្រាវឃាត់ខ្លួនបក្ខពួកម្នាក់ទៀតឈ្មោះ សុខ បូរ៉ា ។ចំណែកឯវត្ថុតាំងចាប់យកពីជនសង្ស័យមានៈ ម៉ូប៊ីនរថយន្តចំនួន១១គ្រាប់ ។
បច្ចុប្បន្ន ជនសង្ស័យទាំង២នាក់រួមទាំងវត្ថុតាំង ត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ៕
ដោយ៖ ស ដារ៉ា
