មន្ត្រីជំនាញមន្ទីរបរិស្ថានខេត្តពោធិ៍សាត់ ក្រោមការដឹកនាំរបស់លោក ប៉ាន់ មរកត ដែលទើបតែងតាំងពេញសិទ្ធិ ជាប្រធានមន្ទីរ ត្រូវបានគេខ្សឹបខ្សៀវថា កំពុងកាក់កបយ៉ាងសម្បើមពីបទល្មើស ការបំផ្លាញព្រៃឈើក្នុងតំបន់ការពារក្នុងខេត្តនេះ ជាពិសេសនៅក្នុងស្រុកវាលវែង ។ ប្រភពបានឲ្យដឹងថា មានមន្ត្រីយោធា, នគរបាល និងបរិស្ថាន កំពុងធ្វើសកម្មភាពកាប់បំផ្លាញព្រៃឈើនៅតំបន់ស្រុកឪរ៉ាល់ និងស្រុកវាលវែង ដោយដឹកឆ្លងកាត់ខេត្តកំពង់ស្ពឺ និងខេត្តកំពត ចេញទៅប្រទេសវៀតណាម ។
សកម្មភាពកាប់បំផ្លាញព្រៃឈើនៅតំបន់ការពារ ក៏មានការចូលរួមចំណែកផងដែរពីមន្ត្រីនគរបាលល្បីឈ្មោះនៅខេត្តពោធិ៍សាត់ គឺលោក ម៉ៅ ។ លោក ម៉ៅ គឺជាមន្ត្រីនគរបាលផង ជាឈ្មួញផង ដែលពីមុន លោកធ្វើសកម្មភាពជួញដូរ ដឹកជញ្ជូនតាមផ្លូវជាតិលេខ៥ ។ ប៉ុន្តែឥឡូវនេះបានដូរទិសដៅ ដោយដឹកជញ្ជូនឈើចេញពីស្រុកវាលវែង និងស្រុក ឪរ៉ាល់ ឆ្លងកាត់ខេត្តកំពង់ស្ពឺ បន្តទៅខេត្តកំពត រួចចេញទៅប្រទេសវៀតណាម ។ សកម្មភាពដឹកជញ្ជូនឈើ ធ្វើឡើងជារៀងរាល់យប់ ។ នៅក្នុងភូមិសាស្ត្រខេត្តពោធិ៍សាត់ ការដឹកជញ្ជូនឈើចេញ គឺជាការទទួលខុសត្រូវរបស់លោកម៉ៅ ។ ផុតពីខេត្តពោធិ៍សាត់ គឺក្រុមមន្ត្រីយោធានៅឯខេត្តកំពង់ស្ពឺបន្តការងារ ។
ដោយ៖ សីលា
