ភ្នំពេញ ៖ បុរសម្នាក់បានស្លាប់នៅនឹងកន្លែងកើតហេតុ នោងបុរសម្នាក់ទៀតបានរងរបួស ខណៈបើកម៉ូតូឌុបគ្នាលឿន គេចពីរថយន្តមិនចាំម៉ាក បានជ្រុលទៅបុកខឿនដួលបោកក្បាលនៅនឹងថ្នល់។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីម៉ោង១២រំលងអធ្រាត្រឈានចូលថ្ងៃទី៩ ខែមករា ឆ្នាំ២០២៣ ស្ថិតនៅតាមបណ្តោយផ្លូវព្រះស៊ីសុវត្តិ
ក្បែរនឹងរង្វង់មូលវត្តភ្នំ សង្កាត់វត្តភ្នំ ខណ្ឌដូនពេញ។
សមត្ថកិច្ចបានឲ្យដឹងថា សពជនរងគ្រោះពុំទាន់ស្គាល់អត្តសញ្ញាណពិតប្រាកដនៅឡើយ តែគេ ហៅឈ្មោះក្រៅ ថាផែនដី ជាបុគ្គលិកបម្រើការងារក្នុងហាងលក់ស៊ុបនៅក្នុងកោះពេជ្រ។
ប្រភពព័ត៌មានពីបុរសជាសន្តិសុខម្នាក់ដែលយាមនៅកន្លែងកើតហេតុ បានឲ្យដឹងថា មុនពេលកើតហេតុគាត់បានឃើញបុរស២នាក់ បើកម៉ូតូម៉ាកហុងដាឌ្រីមសង់សេ១២៥ ពណ៌ខ្មៅមួយគ្រឿងពាក់ស្លាកលេខ ព្រះវិហារ 1D-6685 ឌុបគ្នាធ្វើដំណើរតាមបណ្តោយផ្លូវព្រះស៊ីសុវត្តិ ក្នុងទិសដៅពីជើងមកត្បូងយ៉ាងលឿន ខណៈមកដល់ចំណុចកើតហេតុ បានអកហ្សឺនឹងរថយន្តមិនចាំម៉ាក បានបើកបត់ឆ្លងផ្លូវក៏ជ្រុលចង្កូតហោះទៅបុកខឿនផ្លូវ ដួលបោកក្បាលនៅនឹងថ្នល់បណ្តាលឲ្យបុរសជាអ្នកឌុបបានបែកក្បាលស្លាប់នៅនឹងកន្លែង ចំណែកអ្នករួមដំណើរបានរងរបួសស្រាល ។
បន្ទាប់ពីកើតហេតុសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់វត្តភ្នំ បានចុះមកដល់ទំនាក់ទំនង ទៅផ្នែកសមត្ថកិច្ចចរាចរណ៍ឱ្យចុះមកធ្វើកំណត់ហេតុយកម៉ូតូជនរងគ្រោះ ទៅរក្សាទុកនៅអធិការដ្ឋាននគរបាលខណ្ឌដូនពេញ រង់ចាំសាច់ញាតិមកទទួល និងបានហើយធ្វើកំណត់ហេតុប្រគល់សពឲ្យ ទៅក្រុមគ្រួសារយកទៅធ្វើបុណ្យនៅស្រុកកំណើតតាមប្រពៃណី៕

ដោយ៖ ជ្រោយពេជ្រ