ខេត្តត្បូងឃ្មុំ៖ ទោះបីជាវាមិនចំណេញច្រើនក៏ដោយក៏តម្លៃដំឡូងមីស្រស់ក្នុងមួយគីឡូក្រាម៤០០រៀលអាចធ្វើ ឲ្យប្រជាកសិកររីករាយខ្លះដែរ។ ប្រជាពលរដ្ឋប្រកបរបរដាំដំឡូងមីក្នុងខេត្តត្បូងឃ្មុំ កំពុងប្រមូលផលក្នុងតម្លៃ ១គីឡូក្រាមស្រស់៤០០រៀល លក់ឱ្យឈ្មួញដែលប្រមូលទិញក្បែរៗចំការរបស់ពួកគាត់ដែលតម្លៃនេះគឺអាចទទួលយកបាន ទោះមិនចំណេញច្រើន ក៏ក៏ដោយតែបានប្រាក់ចំណូលខ្លះសម្រាប់ទ្រទ្រង់ជីវភាពគ្រួសារ ។
បើទោះជាមិនថ្លៃក៏ដោយ ប៉ុន្តែតម្លៃនេះប្រហាក់ប្រហែលទៅនឹងបណ្ដាឆ្នាំមុនៗដែរ។ យ៉ាងណាក៏ដោយប្រជា កសិករចំណាយទៅលើថ្នាំនិងជីក៏ដើមទុនច្រើនដែរ។ តម្លៃជីនិងថ្នាំនៅឆ្នាំនេះឡើងខ្ពស់ជាងបណ្ដាឆ្នាំមុនៗដូច្នេះកសិករក៏ត្រូវចំណាយច្រើនទៅតាមនោះដែរ។
លោក សុ ភី អ្នកដាំដំឡូងមី រស់នៅភូមិពើក ឃុំថ្មពេជ្រ ស្រុកត្បូងឃ្មុំ ឱ្យដឹងថា លោកបានប្រកបរបរនេះជាច្រើនឆ្នាំមកហើយ ខណៈនៅឆ្នាំនេះឈ្មួយដែលប្រមូលទិញនៅក្នុងស្រុកគេហ៊ានឱ្យតម្លៃ ចន្លោះពី ៤០០ ទៅ ៤៥០ រៀលក្នុង ១គីឡូក្រាមស្រស់។ លោកបន្តថា បើទោះបីជាវាមិនថ្លៃប៉ុន្តែវាអាចបានប្រាក់ចំណូលខ្លះសម្រាប់ដោះ ស្រាយជីវភាពបានដែរ។ លោកបន្តថា តម្លៃនេះវាមិនចំណេញច្រើននោះទេ សម្រាប់ពួកគាត់ព្រោះការដាំដុះសព្វថ្ងៃគឺត្រូវចំណាយច្រើន ដូចជា លើការភ្ជួដី ឈ្នួលដាំ និងថែទាំ ពិសេសចំណាយលើថ្លៃជី ដែលមានតម្លៃថ្លៃ ។
បើតាមការបញ្ជាក់របស់លោក ហេង ពិសិដ្ឋ ប្រធានមន្ទីកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ បានឱ្យដឹងថា ខេត្តត្បូងឃ្មុំ មានប្រជាពលរដ្ឋដាំដុះដំឡូងមីជិត ៤ម៉ឺនហិកតាក្នុងឆ្នាំ ២០២២ ហើយមួយចំនួនធំកំពុងប្រមូលផលលក់ឱ្យទៅឈ្មួញក្នុងស្រុក ដោយក្នុង១ គីឡូក្រាមស្រស់ ចន្លោះ៤០០រៀល ទៅ៤៥០រៀល ដែលតម្លៃនេះ ប្រហាក់ប្រហែលឆ្នាំមុនដែរ ។
សូមជម្រាបថា ដំឡូងមីជាដំណាំ១ប្រភេទដែលត្រូវចំណាយពេលដាំដុះជិត១ឆ្នាំពេញទើបអាចប្រមូលផលបាន ខណៈមកដល់ពេលនេះ ទីផ្សារធំបំផុតគឺនាំចេញទៅប្រទេសវៀតណាមតាមច្រកព្រំដែនមួយចំនួនក្នុងខេត្តត្បូងឃ្មុំ ៕
