ខេត្តកណ្ដាល៖ កម្លាំងអន្តរាគមន៍ស្រុកស្អាងចុះល្បាត ប្រទះឃើញជនសង្ស័យ២នាក់ជិះម៉ូតូ រួចក៏បានឃាត់ធ្វើការត្រួតពិនិត្យបានរកឃើញគ្រឿងញៀន ១កញ្ចប់តូច ហើយក៏ឃាត់ខ្លួនជនសង្ស័យ២នាក់នោះតែម្ដង។
ការចុះល្បាតខាងលើនេះបានធ្វើឡើងនៅវាលាម៉ោង១០និង៣០នាទីយប់ថ្ងៃទី៨ ខែមិថុនា ឆ្នាំ២០១៦ នៅចំណុចភូមិលេខ៣ ឃុំស្វាយរលំ ស្រុកស្អាង ខេត្តកណ្ដាល។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនខាងលើទី១-ឈ្មោះ ហួន សៀងហៃ ភេទប្រុស អាយុ ៣២ឆ្នាំ ជនជាតិខ្មែរ មុខរបរជាងសំណង់ មានស្រុកកំណើតភូមិភ្នំគួង ឃុំមេបុណ្យ ស្រុកស្វាយអន្ទរ ខេត្តព្រៃវែង ។ បច្ចុប្បន្នស្នាក់នៅផ្ទះជួលភូមិលេខ៣ ឃុំស្វាយរលំ ស្រុកស្អាង និងទី២-ឈ្មោះ ជុំ សម្បត្តិ ភេទប្រុស អាយុ៣០ឆ្នាំ មុខរបរជាងសំណង់ មានទីលំនៅបច្ចុប្បន្នភូមិលេខ៣ ឃុំស្វាយរលំ ស្រុកស្អាង ខេត្តកណ្តាល។ វត្ថុតាងចាប់យកមាន ម្សៅក្រាមពណ៌ស សង្ស័យថាគ្រឿងញៀន (ម៉ាទឹកកក) ១កញ្ចប់តូច និងម៉ូតូ ១គ្រឿង ម៉ាកស៊ុយសូគីស្មាស់ ពណ៌ខ្មៅ ពាក់ស្លាកលេខ កណ្តាល 1P-7121 ។
បច្ចុប្បន្នជនសង្ស័យទាំង២នាក់ខាងលើ រួមទាំងវត្ថុតាង បញ្ជូនមកអធិការដ្ឋាននគរបាលស្រុក ដើម្បីបន្តកសាងសំណុំរឿងតាមនីតិវិធី៕
ដោយ៖ ជឺ តុងឡេង
