ក្រុមម្ចាស់ផ្ទះ Barcelona បាន វាយបក វិញ ដើម្បី ទទួល បាន លទ្ធផល ស្មើ ២–២ ជាមួយក្រុមភ្ញៀវបិសាចក្រហម Manchester United ក្នុង ការ ប្រកួត ជម្រុះ Europa League វគ្គ១៦ក្រុមចុងក្រោយ ជើង ទី១ កាលពីរំលងអធ្រាត្រឈានចូលថ្ងៃសុក្រ ទី១៧កុម្ភៈនេះ។

 United គឺជាក្រុមដែលល្អជាងសម្រាប់ជំនួបនៃការប្រកួត និងគ្រប់គ្រងបាល់បានល្អជាង ប៉ុន្តែត្រូវបានជួយសង្គ្រោះដោយអ្នកចាំទីMarc-Andre ter Stegen ដែលបានធ្វើការសង្គ្រោះបាន៣ដងក្នុងតង់ទីមួយ។

 ក្រុមនាំមុខកំពូលតារាង La Liga អ្នកមានបុណ្យ Barcelona បានរកបានគ្រាប់ដំបូងនៅ៥នាទីបន្ទាប់ពីការសម្រាក ពេលដែលកីឡាករ Marcos Alonso បានស៊ុតបាល់បញ្ចូលទីដោយការតែតបាល់បុកនឹងដី ផុតដៃអ្នកចាំទីក្រុមបិសាចក្រហម Man United នៅនាទីទី៥០។

 ខ្សែប្រយុទ្ធ Marcus Rashford បានតាមស្មើវិញ៣នាទីក្រោយមក បន្ទាប់ពីការវាយបកពីខាងឆ្វេង ដោយបានស៊ុតបាល់បញ្ចូលទីយ៉ាងល្អផុតដៃអ្នកចាំទី Ter Stegen កៀកនឹងបង្គោលទី។ Rashford ដែលស្ថិតក្នុងទម្រង់លេងយ៉ាងល្អក៏បានបង្កើតឱកាសជាគ្រាប់ទីពីររបស់ Man Utd ផងដែរ ដោយបានហក់ចូលទៅក្នុងប្រអប់គ្រោះថ្នាក់ ហើយបញ្ជូនបាល់ទាបចូលទៅមុខទីដែលមានខ្សែការពារ ធ្វើឲ្យបាល់ផ្លាតចូលទៅក្នុងទីខ្លួនឯងដោយសារប៉ះទ្រូងនឹងខ្សែការពារ Jules Kounde របស់ Barcelona។

 កីឡាករ និងអ្នកចាត់ការទូទៅរបស់ United លោក Erik ten Hag បានត្អូញត្អែរយ៉ាងខ្លាំង បន្ទាប់ពីអ្វីដែលមើលទៅហាក់ដូចជាកំហុសយ៉ាងច្បាស់ដោយកីឡាករ Kounde លើខ្សែប្រយុទ្ធ Rashford នៅខាងក្រៅប្រអប់ ដែលជាការបំពានដែលគួរតែទទួលបានកាតក្រហមសម្រាប់កីឡាករអន្តរជាតិបារាំងរូបនេះ។

 ទោះជាយ៉ាងណាក៏ដោយ Barcelona បានវាយបកដណ្តើមបានគ្រាប់បាល់តាមស្មើវិញនៅនាទីទី៧៦ ហើយកំហុសដោយខ្សែការពាររបស់ United បានបញ្ជូនបាល់មិនផុតធ្វើឲ្យជាប់ជើងនឹងខ្សែបម្រើប្រយុទ្ធ Raphinha ស៊ុតផុតដៃអ្នកចាំទី David de Gea ចូលទីបានសម្រេច។

 លទ្ធផលស្មើគ្នានេះ ធ្វើឲ្យក្រុមទាំង២ត្រូវការឈ្នះដូចគ្នាក្នុងការប្រកួតជើងទី២បន្តទៀត ដែលការប្រកួតក្របខ័ណ្ឌ Europa League ជើងទី២ ដែលនឹងត្រូវប្រកួតនៅថ្ងៃទី២៤ ខែកុម្ភៈខាងមុខនេះ៕ (រូបភាព ៖ BBC Sport/Reuters/CNA)