ខេត្តសៀមរាប៖ បើយោងតាមប្រភពពី ៖ អគ្គស្នងការដ្ឋាននគរបាលជាតិ បានអោយដឹងថា,នៅថ្ងៃព្រហស្បតិ៍ ទី០២ ខែមីនា ឆ្នាំ២០២៣ ឧត្តមសេនីយ៍ឯក លឹម ផាន់ភារៈ ប្រធាននាយកដ្ឋានកណ្តាលសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានអញ្ជើញចុះត្រួតពិនិត្យទីតាំងដែលគ្រោងសាងសង់ប៉ុស្តិ៍សម្រាប់នគរបាលកាពារបេតិកភណ្ឌតំបន់អង្គរ ដោយមានការអញ្ជើញចូលរួមអមដំណេីរដោយ លោក អនុប្រធាននាយកដ្ឋានកណ្តាលសណ្តាប់ធ្នាប់សាធារណៈ លោកអនុប្រធាននាយកដ្ឋាននគរបាលការពារបេតិកភណ្ឌ ប្រធានអង្គភាពនគរបាលការពារបេតិកភណ្ឌប្រចាំតំបន់អង្គរ ប្រធានអង្គភាពនគរបាលទេសចរណ៍ប្រចាំខេត្តសៀមរាប ព្រមទាំងមានការចូលរួមពីតំណាងអាជ្ញាធរជាតិអប្សរា ផងដែរ។
គម្រោងសាងសង់ប៉ុស្តិ៍សម្រាប់នគរបាលកាពារបេតិកភណ្ឌតំបន់អង្គរនេះ គឺដេីម្បីសម្រួលដល់ការបម្រេីការងាររបស់កងកម្លាំងនគរបាលការពារបេតិកភណ្ឌ ឱ្យមានអគារស្នាក់នៅ និងទីកន្លែងបម្រេីការងារសមរម្យ សម្រាប់បំពេញភារកិច្ចប្រចាំថ្ងៃ ការពារសារពេីបតិកភណ្ឌ សម្បត្តិវប្បធម៌ប្រវត្តិសាស្ត្រជាតិ ក៍ដូចជាការពារសុវត្ថិភាព សន្តិសុខសណ្តាប់ធ្នាប់ជូនភ្ញៀវទេសចរណ៍ជាតិ និងអន្តរជាតិ ដែលមកបំពេញទស្សនកិច្ច ឬធ្វេីទេសចរណ៍ក្នុងតំបន់បេតិកភណ្ឌប្រវត្តិសាស្រ្តនេះផងដែរ។ តាមគម្រោងផែនការ ប៉ុស្តិ៍សម្រាប់នគរបាលការពារបេតិកភណ្ឌដែលគ្រោងសាងសង់មានចំនួន ១៥ប៉ុស្តិ៍ រួមមានប៉ុស្តិ៍ធំចំនួន០៥ ទំហំ ១២x១២មែត្រ រោងយាម ចំនួន១០ ទំហំ ៦x១២មែត្រ។ ប៉ុស្តិ៍ទីមួយ ដែលត្រៀមសាងសង់ជាគំរូមុនគេ មានទីតាំងនៅមុខក្លោងទ្វារទន្លេអ៊ុំ។
សូមបញ្ជាក់ថា ប៉ុស្តិ៍ដែលគ្រោងសាងសង់ខាងលេីគឺ
ជាអំណោយដ៏ថ្លៃថ្លារបស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នៃអគ្គស្នងការនគរបាលជាតិ និងលោក ទៀ សីហា អភិបាល នៃគណអភិបាលខេត្តសៀមរាប ព្រមទាំងសប្បុរសជននានាផងដែរ៕
ដោយ : សហការី
