កីឡាករ Iker Casillas អ្នកចាំទីជម្រើស ជាតិអេស្ប៉ាញបានបញ្ជាក់ឲ្យដឹងថា រូបគាត់ នឹងចូលនិវត្តន៍ក្រោយអ្នកចាំទីរបស់អុីតាលី លោក Gianluigi Buffon។

អ្នកចាំទីជើងចាស់ Gianluigi Buffonបានសម្រេចចិត្តបន្តកិច្ចសន្យាថ្មីជាមួយក្រុមសេះបង្កង់Juventusកាលពីខែឧសភាដែលធ្វើឲ្យគាត់លេងនៅក្នុងក្លិបនេះរហូតដល់ រដូវកាលឆ្នាំ២០១៧-២០១៨ទើបចប់។

ចំណែកកីឡាករ Iker Casillas អតីត អ្នកចាំទីរបស់ក្លិប Real Madrid មានអាយុ ប្អូនកីឡាករ Gianluigi Buffon ៣ឆ្នាំ គាត់បានចុះហត្ថលេខាលេងឲ្យក្រុម Porto ប្រទេសព័រទុយហ្គាល់រហូតដល់ឆ្នាំ២០១៨ ដោយមិនបញ្ជាក់ពីពេលចូលនិវត្តន៍ទេ។

កីឡាករវ័យ៣៥ឆ្នាំ Iker Casillas បាននិយាយប្រាប់កាសែតកីឡារបស់អុីតាលី La Gazzetta delloថា “ក្រោយពេលគាត់ (Buffon)ចូលនិវត្តន៍ខ្ញុំនឹងចូលនិវត្តន៍ដែរ។ គាត់ទើបតែចុះកិច្ចសន្យាថ្មីដែលធ្វើឲ្យខ្ញុំ សប្បាយចិត្តព្រោះថាខ្ញុំក៏នឹងអាចធ្វើដូចគាត់ដែរ” ។

គួរបញ្ជាក់ថា Casillas ធ្លាប់ចូលរួម ជាមួយក្រុមអេស្ប៉ាញឈ្នះជើងឯកពិភព លោកចំនួន១សម័យនិងជើងឯកយូរ៉ូ២ សម័យ ៕

ដោយ៖ ដេវីត