ក្រោយពេលបញ្ចប់ការងារដំណាក់កាលទី១ ប្រព័ន្ធធារាសាស្រ្តបាសាក់ មានលទ្ធភាពស្រោចស្រពលើផ្ទៃដីស្រូវវស្សា ចំនួន ៦,៥០០ហិកតា និងស្រូវប្រាំងចំនួន ៦០០ហិកតា ។ ការងារនៅក្នុងដំណាកាលទី១នេះបានអនុវត្តរួចរាល់ជាស្ថាពរហើយ ។

បច្ចុប្បន្នក្រុមការងារកំពុងបន្តអនុវត្តនៅក្នុងជំហានទី២ ដើម្បីបង្កើនសក្តានុពលរបស់ប្រព័ន្ធធារាសាស្ត្របាសាក់ឲ្យមានលទ្ធភាពស្រោចស្រពបន្ថែមលើផ្ទៃដីចំនួន ២៤,០០០ហិកតា និងការផ្គត់ផ្គង់ទឹកដល់ស្ទឹងមោងសម្រាប់ការប្រើប្រាស់ប្រចាំថ្ងៃព្រមទាំងដំណាំរួមផ្សំមួយចំនួនទៀត ។ ការងារដែលត្រូវអនុវត្តក្នុងដំណាក់កាលទី២ រួមមាន ៖
– ជីកប្រឡាយមេ ១ខ្សែ ដើម្បីទាញទឹកពីប្រព័ន្ធបាសាក់ទៅផ្គត់ផ្គង់ផ្ទៃដីកសិកម្មក្នុងស្រុកវាលវែង និងស្រុកបាកាន ខេត្តពោធិ៍សាត់ ។
– ស្តារឡើងវិញនូវប្រព័ន្ធព្រែកជីក ។
– ជួសជុលស្តារឡើងវិញនូវទំនប់ដូនទ្រី ដើម្បីស្តុកទឹកបន្ថែមសម្រាប់ផ្គត់ផ្គង់ទឹកឲ្យអាងទឹកបាសាក់ ។

ក្នុងការចុះពិនិត្យការដ្ឋាននៅពេលនេះលោករដ្ឋមន្ត្រីបានធ្វើការណែនាំបន្ថែមដល់ក្រុមហ៊ុនទីប្រឹក្សាបច្ចេកទេស ត្រូវយកចិត្តទុកដាក់ត្រួតពិនិត្យតាមដានការអនុវត្កម្រោងឲ្យបានជាប់ជាប្រចាំសំដៅធ្វើយ៉ាងណាឲ្យក្រុមហ៊ុនសាងសង់អនុវត្តឲ្យបានត្រឹមត្រូវទៅតាមបទដ្ឋានបច្ចេកទេស ហើយលទ្ធផលការងារដែលសម្រេចបានប្រកបដោយគុណភាព ពិសេសត្រូវយកចិត្តទុកដាក់ចំពោះផ្លូវដែលកាត់ដោយប្រឡាយមេធំៗ ត្រូវសាងសង់ស្ពានសម្រាប់ការធ្វើដំណើរឆ្លងកាត់របស់បងប្អូនប្រជាពលរដ្ឋនៅតំបន់នោះ ៕