ខេត្តបន្ទាយមានជ័យ៖ បើតាមការបញ្ជាក់ពីកម្លាំងនគរបាលស្រុកថ្មពួក នៅព្រឹកថ្ងៃពុធទី០៨ ខែមីនា ឆ្នាំ២០២៣នេះ បានឱ្យដឹងថា៖ មានករណីគ្រោះថ្នាក់ចរាចរណ៍មួយបានកេីតឡេីងបណ្ដាលឱ្យមនុស្សចំនួន ០២នាក់ស្លាប់ និង ០៥នាក់ទៀតរងរបួសធ្ងន់ ខណៈដែលកូនកំលោះ កូនក្រមុំ និងអ្នករួមដំណេីរជាច្រេីននាក់ នាំគ្នាជិះគោយន្តកន្ត្រៃយកលុយទៅប្រគល់ជូនខាងស្រី ដើម្បីរៀបមង្គលការនៅថ្ងៃទី២២ ខែមីនា ឆ្នាំ២០២៣ខាងមុខនេះ ប៉ុន្តែដោយសារគោយន្តដាច់ដៃចង្កូត ក៏រ៉េធ្លាក់ចូលប្រឡាយទឹកក្រឡាប់តែម្តង។
មន្ត្រីនគរបាលស្រុកថ្មពួក បានបន្ថែមថា ហេតុការណ៍ខាងលើនេះបានកើតឡើងនៅថ្ងៃទី៨ ខែមីនា ឆ្នាំ២០២៣ វេលាម៉ោង០៣និង៤០នាទីទៀបភ្លឺ នៅចំណុចកំណាត់ផ្លូវលេខ២៥៦៣ (ថ្មពួកបឹងត្រកួន) ខាងកើតវត្តគោករមៀត ប្រហែល៣០០ម៉ែត្រ ចន្លោះគីឡូម៉ែត្រលេខ១២-១៣ ស្ថិតក្នុងភូមិគោករមៀត ឃុំគោករមៀត ស្រុកថ្មពួក ខេត្តបន្ទាយមានជ័យ ។
ប្រភពដដែលបន្តថា មុនពេលកើតហេតុ ឈ្មោះ ឡាត់ សុខា ភេទប្រុស អាយុ៣៦ឆ្នាំ រស់នៅភូមិបឹងតាស្រី ឃុំគោករមៀត ស្រុកថ្មពួក ខេត្តបន្ទាយមានជ័យ បានបើកបរគោយន្ដកន្ត្រៃក្នុងគោលបំណងយកលុយទៅប្រគល់ឱ្យម្តាយឪពុកខាងស្រី នៅភូមិគោកត្រាច ឃុំគោកស្នួល ស្រុកក្រឡាញ់ ខេត្តសៀមរាប ក្នុងទិសដៅពីលិចទៅកើត និងរួមដំណើរមានគ្នា០៧នាក់ ក្នុងនោះ(កូនកំលោះ-កូនក្រមុំ) និងមានដាក់អុសផងដែរ។
ខណៈដែលបើកមកដល់ចំណុចកើតហេតុខាងលើ គោយន្តកន្ត្រៃក៏បានជាប់កាំលាវ (ចង្កូត) ហើយក៏រ៉េក្បាលគោយន្តកន្ត្រៃធ្លាក់ចូលប្រឡាយជ្រៅខាងឆ្វេង ក្រឡាប់តែម្ដង បណ្ដាលឱ្យអ្នកបើកររួមដំណើររួមមាន ៖១/- ឈ្មោះ ព្រឿន មឹក ភេទស្រី អាយុ៣៣ឆ្នាំ (ស្លា.ប់) នៅនឹងកន្លែងកើតហេតុ, ២/- ឈ្មោះ ព្រឿន សៀត ភេទស្រី អាយុ៣៦ឆ្នាំ របួសធ្ងន់, ៣/- ឈ្មោះ អិន អាន ភេទប្រុស អាយុ៣៥ឆ្នាំ របួសបាក់ដៃ, ៤/- ឈ្មោះ ឈី វ៉ាន់ថៃ ភេទប្រុស អាយុ១៨ឆ្នាំ កូនកំលោះ (ស្លា.ប់) ខណៈពេលបញ្ជូនដល់មន្ទីរពេទ្យបង្អែកស្រុកថ្មពួក, ៥/ -ឈ្មោះ ជាតិ សុខន ភេទស្រី អាយុ១៩ឆ្នាំ រស់នៅភូមិគោកត្រាច ឃុំគោកស្នួល ស្រុកក្រឡាញ់ ខេត្តសៀមរាប (កូនក្រមុំ) របួសបាក់ដៃឆ្វេង, ៦/- ឈ្មោះ ហាប់ តល់ ភេទប្រុស អាយុ៥៥ឆ្នាំ រស់នៅភូមិជាមួយគ្នា របួសបាក់ជើងខាងស្ដាំ ចំណែកអ្នកបើកបរពុំមានរងរបួសទេ។
ក្រោយកេីតហេតុ កម្លាំងប៉ុស្ដិ៍មូលដ្ឋាន បានសហការជាមួយកម្លាំងជំនាញចរាចរណ៍ស្រុកថ្មពួក ចុះទៅដល់កន្លែងកើតហេតុ និងដឹកអ្នករបួសយកទៅសង្គ្រោះនៅមន្ទីពេទ្យបង្អែកស្រុកថ្មពួក។
គួរបញ្ជាក់ថា អ្នកស្លាប់ទាំងពីរនាក់នេះ ម្នាក់ជាកូនកំលោះ និងម្នាក់ទៀតត្រូវជាបងស្រីជីដូនមួយរបស់កូនកំលោះ បច្ចុប្បន្នសពត្រូវសមត្ថកិច្ចជំនាញប្រគល់ជូនក្រុមគ្រួសារសាច់ញាតិ ដឹកយកទៅធ្វើបុណ្យតាមប្រពៃណី៕ដោយ៖សហការី
