ភ្នំពេញ៖ ក្រសួងកសិកម្ម រុក្ខាប្រមាញ់និងនេសាទ នៅរសៀលថ្ងៃចន្ទទី១៣ ខែមីនា ឆ្នាំ២០២៣នេះ បានឱ្យដឹងថា លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា៖ លោកចង់ឃើញការនាំចេញទៅកាន់ពិភពលោកក្នុងនាមសហគមន៍អាស៊ាន ដោយមិនមែនក្នុងនាមប្រទេសណាមួយឡើយ តាមរយៈការប្រើប្រាស់នូវមធ្យោបាយដែលមានស្រាប់ ដើម្បីទទួលបាននូវផលចំណេញ។
ការថ្លែងបែបនេះរបស់លោករដ្ឋមន្រ្តី បានធ្វេីឡេីងនាឱកាសទទួលជួបសម្តែងការគួរសមជាមួយលោក Cherdkiat ATTHAKOR ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រថៃ កាលពីថ្ងៃទី១០ ខែមីនាថ្មីៗនេះ នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។
ក្នុងជំនួបនេះ លោករដ្ឋមន្ត្រី បានជម្រាបឯកឧត្តមឯកអគ្គរាជទូតអំពីការរៀបចំបង្កើតប៉ូលសេដ្ឋកិច្ចទី៤ ដែលស្ថិតនៅតាមបណ្តោយព្រំដែនកម្ពុជាថៃ ជាប់នឹងខេត្តចំនួន៤នៃព្រះរាជាណាចក្រកម្ពុជា មានខេត្តពោធិសាត់ បាត់ដំបង បន្ទាយមានជ័យ និងខេត្តប៉ៃលិន ជាតំបន់មានសក្តានុពលសេដ្ឋកិច្ចលើវិស័យកសិកម្ម ដែលទាមទារឱ្យមានដៃគូពាណិជ្ជកម្មពិតប្រាកដ និងមាននិរន្តរភាព។
តាមរយៈកិច្ចប្រជុំនេះ លោករដ្ឋមន្ត្រី បានគាំទ្រចំពោះការស្នើឱ្យមានទស្សនកិច្ចផ្លាស់ប្ដូរបទពិសោធ កម្មវិធីបណ្តុះបណ្តាលដូចជា TICA និងកិច្ចសហប្រតិបត្តិការដែលអនុវត្តជាក់ស្តែង ពិសេសលើវិស័យកសិកម្ម ព្រមទាំងកិច្ចព្រមព្រាងពាណិជ្ជកម្មសេរីផងដែរ។
លោករដ្ឋមន្ដ្រីបានសង្កត់ធ្ងន់ថា លោកចង់ឃើញការនាំចេញទៅកាន់ពិភពលោកក្នុងនាមសហគមន៍អាស៊ាន ដោយមិនមែនក្នុងនាមប្រទេសណាមួយឡើយ តាមរយៈការប្រើប្រាស់នូវមធ្យោបាយដែលមានស្រាប់ ដើម្បីទទួលបាននូវផលចំណេញ។ លោករដ្ឋមន្ត្រី នឹងបង្កើតក្រុមការងារមន្ត្រីជាន់ខ្ពស់ ដើម្បីពិភាក្សាលម្អិតតាមអនុវិស័យនីមួយៗ ហើយឯកឧត្តមផ្ទាល់នឹងជួយគាំទ្របន្ថែមរួមទាំងទិដ្ឋភាពនយោបាយផងដែរ ដើម្បីជំរុញការងារនេះឱ្យដំណើរការរលូន៕
ដោយ៖សហការី
