ភ្នំពេញ ៖ នារី៣នាក់បានរងរបួសធ្ងន់ស្រាលខណៈដែលជួបគ្រោះថ្នាក់ចរាចរណ៍បង្ករឡើងដោយម៉ូតូ ZOOMER-X បុកម៉ូតូស្គួបពី ពីក្រោយពេញទំហឹង។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១និង១០នាទីរសៀលថ្ងៃ១៥ ខែមិថុនា ឆ្នាំ២០១៦ តាមបណ្តោយផ្លូវសហព័ន្ឌរុស្សី ភូមិចុងថ្នាល់ខាងលិច សង្កាត់ទឹកថ្លា ខណ្ឌសែនសុខ។

អ្នកឃើញហេតុការណ៍នៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញមានម៉ូតូម៉ាកស្គូបពី១គ្រឿង ពណ៌ផ្កាឈូក ពាក់ស្លាកលេខភ្នំពេញ 1CA-3931 បើកបរដោយនារីម្នាក់ពុំស្គាល់អត្តសញ្ញាណក្នុងទិសដៅពីកើតទៅលិចលុះមកដល់ចំណុចកើតហេតុក៏មានម៉ូតូ១គ្រឿងទៀតម៉ាក ZOOMER-X ពណ៌ខ្មៅលាយទឹកប្រាក់ ពាក់ស្លាកលេខភ្នំពេញ 1FQ-3336 បើកបរដោយនារី២នាក់ក្នុងទិសដៅស្របគ្នាពីកើតទៅលិចក្នុងល្បឿនលឿនក៏ជ្រុលទៅបុកនិងម៉ូតូស្គូបពីៗក្រោយបណ្តាលឲ្យនារីជាម្ចាស់ម៉ូតូស្គូបពីដួលបោកក្បាលរបួសធ្ងន់និងនារីអ្នកបើកម៉ូតូ ZOOMER-X ម្នាក់ក៏រងរបួសធ្ងន់ដែរហើយនារីដែលជិះពីក្រោយរងរបួសស្រាល។

ក្រោយកើតហេតុក៏មាននគរបាលចរាចរណ៍ខណ្ឌសែនសុខចុះមកធ្វើការវាស់វែងនិងទាក់ទងហៅរថយន្តសាម៊ុយដឹកនារីរងគ្រោះទៅសង្គោះនៅមន្ទីរពេទ្យឯកជន។ ចំណែកម៉ូតូទាំង២គ្រឿងសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីដោះស្រាយនៅពេលក្រោយ៕

ដោយ៖ តុង សីហា