សារព័ត៌មាន Reuters នៅថ្ងៃសៅរ៍ ទី២៥ ខែមីនា ឆ្នាំ២០២៣ បានផ្សាយថា អាជ្ញាធរនៅក្នុងប្រទេសអេស្ប៉ាញបានឱ្យដឹងនៅថ្ងៃសុក្រសប្ដាហ៍នេះថា ភ្លើងឆេះព្រៃធំដំបូងបំផុតមួយនៅក្នុងឆ្នាំ២០២៣នេះ ដែលបាននិងកំពុងឆាបឆេះនៅឯតំបន់ Valencia ស្ថិតនៅភាគខាងកើតនៃប្រទេស បានបំផ្លាញព្រៃឈើលើផ្ទៃដីជាង ៣,០០០ហិកតាហើយ និងបង្ខំឱ្យប្រជាជន ១,៥០០នាក់បោះបង់ចោលផ្ទះសម្បែងរបស់ខ្លួន។

ក្រុមអ្នកពន្លត់អគ្គិភ័យចំនួន ៥០០នាក់គាំទ្រដោយយន្ដហោះ និងឧទ្ធម្ភាគចក្រចំនួន១៨គ្រឿង បាននិងកំពុងតស៊ូប្រយទ្ធជាមួយអណ្ដាតភ្លើងឆេះព្រៃ ជាពិសេសគឺភ្លើងឆេះព្រៃនៅក្បែរភូមិ វីយ៉ានូអេវ៉ា ដេ វីវែរ (Villanueva de Viver) នៃតំបន់វ៉ាឡិនសៀ (Valencia)។
នៅក្នុងប្រទេសអេស្ប៉ាញកាលពីឆ្នាំ២០២២កន្លងទៅ ភ្លើងឆេះព្រៃ ៤៩៣កន្លែងបានបំផ្លាញព្រៃឈើលើផ្ទៃដី ៣០៧,០០០ហិកតាឯណោះ ហើយមូលហេតុចម្បងមួយដែលបណ្ដាលឱ្យមានភ្លើងឆេះព្រៃ គឺមានជាប់ពាក់ព័ន្ធនឹងការប្រែប្រួលអាកាសធាតុ៕ ដោយធីរីណា

រូប​ថត​ : TTXVN-VNA