ស្ថាប័នគ្រប់គ្រងបាល់ទាត់ពិភពលោក (FIFA) និងសមាគមក្លិបអឺរ៉ុប (ECA) បានប្រកាសថា សំណងរបស់ FIFA ដែលបានបង់ទៅឱ្យក្លិបដែលអនុញ្ញាតឲ្យកីឡាករសម្រាប់ការប្រកួតបាល់ទាត់ពិភពលោកបុរសត្រូវបានកើនឡើងជិត៧០ភាគរយដល់៣៥៥លានដុល្លារសម្រាប់ការប្រកួត World Cup ឆ្នាំ២០២៦ និង World Cup ឆ្នាំ២០៣០។
កម្មវិធីអត្ថប្រយោជន៍នេះផ្តល់ឱ្យក្លិបនូវចំណែកនៃប្រាក់ចំណូលពីការប្រកួតក្រុមជម្រើសជាតិជាថ្នូរនឹងការឲ្យកីឡាករចូលរួម និងក៏ការពារក្លិបក្នុងករណីកីឡាកររបស់ពួកគេរងរបួសក្នុងកាតព្វកិច្ចអន្តរជាតិ។ ចំនួនទឹកប្រាក់ដែលបានកំណត់ពីមុនសម្រាប់ World Cup 2018 និង World Cup 2022 គឺ២០៩លានដុល្លារ។ អនុស្សរណៈនៃការយោគយល់គ្នាថ្មីមួយត្រូវបានចុះហត្ថលេខាកាលពីថ្ងៃដើមសប្តាហ៍នេះនៅឯមហាសន្និបាត ECA នៅទីក្រុង Budapest ប្រទេសហុងគ្រី។
ប្រធាន ECA លោក Nasser Al-Khelaifi បាននិយាយថា “យើងមានសេចក្តីសោមនស្សរីករាយដែលបានចុះហត្ថលេខាលើកិច្ចព្រមព្រៀងដ៏សំខាន់នេះ។ MOU ទទួលស្គាល់តួនាទីស្នូលរបស់ក្លិបក្នុងបាល់ទាត់ទូទាំងពិភពលោក ហើយធានាថា ពួកគេត្រូវបានតំណាងយ៉ាងត្រឹមត្រូវក្នុងការសម្រេចចិត្តជុំវិញបញ្ហាដែលប៉ះពាល់ដល់ពួកគេ”។
កាលពីដើមខែនេះ FIFA បានប្រកាសថា ការប្រកួត Club World Cup ដែលមាន៣២ក្រុមនឹងត្រូវលេងរៀងរាល់៤ឆ្នាំចាប់ពីខែមិថុនា ឆ្នាំ២០២៥ ដោយជំនួសការប្រកួតប្រចាំឆ្នាំរបស់ខ្លួនដែលមានក្រុមចំនួន៧។
ការសម្រេចចិត្តនេះត្រូវបានជួបជាមួយនឹងការប្រឆាំងពីលីកដូចជា La Liga របស់អេស្ប៉ាញ ប៉ុន្តែ MoU ឥឡូវនេះនឹងមានទាំងFIFA និង ECA ធ្វើការរួមគ្នាលើទិដ្ឋភាពកីឡា និងពាណិជ្ជកម្មផ្សេងៗសម្រាប់ការបោះពុម្ពឆ្នាំ២០២៥។
FIFA និង ECA ឥឡូវនេះនឹងបង្កើតការអនុវត្តការងារកាន់តែជិតស្និតលើការប្រកួត Club World Cup នាពេលខាងមុខ និងធ្វើការរួមគ្នាលើការផ្សព្វផ្សាយនានា រួមទាំងរចនាសម្ព័ន្ធសក្តានុពលសម្រាប់ការគ្រប់គ្រងសិទ្ធិពាណិជ្ជកម្មនាពេលខាងមុខ។ FIFA ក៏ បានប្រកាស ផងដែរ នូវ ប្រតិទិន អន្តរជាតិ ថ្មី មួយ ដែល ប្រធាន របស់ ខ្លួន លោក Gianni Infantino បាន និយាយ ថា ត្រូវ បានអនុម័ត ដោយ ECA។
លោក Infantino ប្រធាន FIFA បានបញ្ជាក់ថា ដើម្បីឱ្យមានប្រតិទិនប្រកួតអន្តរជាតិថ្មីដែលគាំទ្រដោយ ECA ផ្តល់នូវតុល្យភាពចាំបាច់រវាងក្លិប និងបាល់ទាត់ជម្រើសជាតិ។ FIFA មានគម្រោងដ៏គួរឱ្យរំភើបនៅខាងមុខរួមទាំង FIFA Club World Cup ថ្មីនៅឆ្នាំ២០២៥ និង FIFA Women’s Club World Cup ថ្មី។ កិច្ចសហការយ៉ាងជិតស្និទ្ធជាមួយក្លិបនៅអឺរ៉ុប និងជុំវិញពិភពលោកនឹងមានសារសំខាន់សម្រាប់ភាពជោគជ័យនៃព្រឹត្តិការណ៍ទាំងនោះ” ៕ (រូបភាព ៖ Reuters/CNA)
