ខេត្តស្វាយរៀង៖ មានការភ្ញាក់ផ្អើលទាំងយប់ដល់ម្ចាស់ផ្ទះជួលនិងរាយការណ៍ទៅសមត្ថកិច្ចមូលដ្ឋានបន្ទាប់ពីប្រទះឃើញនារីជាបុគ្គលិកកាស៊ីណូម្នាក់ដាច់ក្បាលនៅក្នុងបន្ទប់ទឹកដែលសង្ស័យជាករណីឃាតកម្មអារ.កសម្លាប់រួចឃាតកបានរត់គេចខ្លួនបាត់។

   ហេតុការណ៍នេះបានកើតឡើងកាលពីវេលាម៉ោង០០និង៤០នាទីរំលងអធ្រាត្រឈានចូលថ្ងៃទី២០ ខែមេសា ឆ្នាំ២០២៣នៅចំណុចបន្ទប់ជួលផ្លូវកំពង់ស្ពាន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។

   ពាក់ពន្ធ័ករណីខាងលើនេះដែរលោកអែម សុវណ្ណារិទ្ធ អធិការនគរបាលក្រុងបាវិតបានអោយដឹងនៅរសៀលនេះថាពិតជាមានករណីឃាតកម្មខាងលើប្រាកដមែន ដោយជនរងគ្រោះមានឈ្មោះ ម៉ន ស្រីម៉ី ភេទស្រី អាយុ២៤ឆ្នាំ មុខរបរបុគ្គលិកកាស៊ីណូ DYNASTY មានស្រុកកំណើតនៅភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល បច្ចុប្បន្នស្នាក់នៅបន្ទប់ជួលក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

   លោកបន្តថា រហូតមកដល់ពេលនេះកម្លាំងសមត្ថកិច្ចរបស់លោកនិងកម្លាំងសមត្ថកិច្ចនគរបាលនៃស្នងការដ្ឋានខេត្តកំពុងធ្វើការស្រាវជ្រាវបន្តទៀតដើម្បីស្វែងរកជនសង្ស័យមកចាត់ការតាមច្បាប់អោយខាងតែបាន៕ ដោយសុថាន