ខេត្តកំពត៖ ហេតុការណ៍បាញ់ប្រហារមួយបានកើត ឡើង នៅវេលាម៉ោង១០ព្រឹក ថ្ងៃទី២៧ ខែមេសា ឆ្នាំ ២០២៣នេះ ស្ថិតក្នុងភូមិបាល ឃុំតានី ស្រុកអង្គរជ័យ ខេត្តកំពត បណ្ដាលឲ្យមនុស្ស២នាក់ស្លាប់ភ្លាមៗ រួចបាញ់ខ្លួនឯងតាមក្រោយ តែមិនស្លាប់ដោយរងរបួសធ្ងន់ចំទ្រូង។

ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានឲ្យដឹងថា ក្រោយទទួលបានព័ត៌មាន លោកបានបញ្ជាកម្លាំងជំនាញ នៃស្នងការដ្ឋាននគរបាលខេត្តនិងកម្លាំងអធិការដ្ឋាននគរបាលស្រុកអង្គរជ័យចុះដល់កន្លែងកើតហេតុ។ ពេលទៅដល់កម្លាំងជំនាញបានពិនិត្យឃើញថា ជនសង្ស័យឈ្មោះ ឡាយ សំអាត ហៅចែម អាយុ៣៩ឆ្នាំ មានទី លំនៅភូមិ-ឃុំកើតហេតុខាង លើ បានធ្វើសកម្មភាពបាញ់ទៅលើបងថ្លៃ និងបងជីដូន មួយរបស់ខ្លួនដោយប្រើប្រាស់អាវុធម៉ាក RPK (គ្រាប់ AK) ជាច្រើនគ្រាប់ បន្ទាប់មកបានធ្វើអត្តឃាតដោយបាញ់ចំនួន១ គ្រាប់ ចំដើមទ្រូង (របួសធ្ងន់)។ បច្ចុប្បន្នបានសមត្ថកិច្ចដឹកតាមរថយន្តសង្គ្រោះ នៅមន្ទីរពេទ្យបង្អែកខេត្តកំពត។

ដោយឡែក ជនរងគ្រោះទាំងពីរនាក់ ទី១៖ ឈ្មោះ នួន សុខា ភេទស្រី អាយុ៤២ឆ្នាំ មុខរបរគ្រូបង្រៀន មានទី លំនៅភូមិ-ឃុំកើតហេតុខាងលើ (បងជីដូនមួយជន សង្ស័យ) ​រង​គ្រាប់​កាំភ្លើង​​ ០២គ្រាប់ បណ្ដាល​ឲ្យ​ ស្លាប់នៅនឹងកន្លែងកើត ហេតុនិងទី២៖ ឈ្មោះ អៀង ស៊ុន ភេទស្រី អាយុ៤៧ឆ្នាំ មុខរបរកសិករ មានទីលំនៅភូមិ-ឃុំកើតហេតុខាងលើ (បងថ្លៃជនសង្ស័យ)រង​គ្រាប់​កាំភ្លើង​​ ០២គ្រាប់ បណ្ដាល​ឲ្យ​ស្លាប់នៅពេលដែលបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកខេត្តតាកែវ។ 

បើតាមលោកឧត្តមសេនីយ៍ស្នងការ មូលហេតុដែលជនសង្ស័យមានគំនុំខឹងនឹងបងជីដូនមួយ និងបងថ្លៃ ហើយជនសង្ស័យជាមុខសញ្ញាដែលប្រើប្រាស់គ្រឿង ញៀន។ បច្ចុប្បន្នកម្លាំងសមត្ថកិច្ច កំពុងកសាងសំណុំ រឿងបញ្ជូនទៅតុលាការដើម្បីចាត់ការតាមនីតិវិធី៕