ភ្នំពេញ៖ ផ្ទះប្រជាពលរដ្ឋលក់បាយ និង កាហ្វេមួយល្វែងត្រូវបានអគ្គិភ័យឆាបឆេះក្នុងបន្ទប់គេងជាន់ទី១ យ៉ាងសន្ធោសន្ធៅ ដោយសារមូលហេតុឆ្លងចរន្តអគ្គីសនី។

ហេតុការណ៍គ្រោះអគ្គិភ័យនេះបានកើតឡើងកាលពីវេលាម៉ោង១២ថ្ងៃត្រង់ ថ្ងៃទី១១ ខែឧសភា ឆ្នាំ២០២៣ ស្ថិតត្រង់ចំណុចផ្ទះលក់បាយ និង កាហ្វេមួយកន្លែង តាមបណ្តោយផ្លូវទួលពង្រ ក្នុងបុរីឡុងនី សង្កាត់ចោមចៅទី១ ខណកឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីស្ត្រីដែលជាម្ចាស់ផ្ទះបានបញ្ជាក់ថា មុនពេលកើតហេតុ មានបញ្ហាផ្ទុះសេខ្សែភ្លើងនៅបន្ទប់គេងជានទី១ បង្កជាអណ្តាតភ្លើងឆាបឆេះយ៉ាងសន្ធោសន្ធៅ ខណៈនោះម្ចាស់ផ្ទះ និង ប្រជាពលរដ្ឋដែលជាអ្នកជិតខាង បានព្យយាមយកបំពុងពន្លត់អគ្គិភ័យបាញ់ពន្លត់ដែរ តែដោយសារស្ថានភាពភ្លើងឆាបឆេះខ្លាំងពេក ទើបធ្វើឲ្យពួកគាត់គ្រប់គ្រងលែងបាន មានតែប្រមូលសម្ភារៈមានតម្លៃ និង បំពុងហ្គាស ចេញពីកន្លែងកើតហេតុ រួចរាយការណ៍ទៅកាន់ កម្លាំងបង្ការ ពន្លត់អគ្គិភ័យ និង សង្គ្រោះ ដើម្បីចេញជួយអន្តរាគមន៍។

លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹងថា​ ក្រោយពីទទួលបានព័ត៌មានពីប្រជាពលរដ្ឋភ្លាម​ លោក​ ក៏បានបញ្ចេញរថយន្តពន្លត់អគ្គិភ័យ របស់ការិយាល័យ បានចេញមកអន្តរាគមន៍ និងប្រើប្រាស់ជួយបាញ់ពន្លត់ភ្លាមៗ ជៀសវាងបង្កការរាលដាលដល់ផ្ទះប្រជាពលរដ្ឋ ឬបង្កគ្រោះថ្នាក់ដល់មនុស្ស។

នៅក្នុងរង្វង់នៃប្រត្តិការណ៍ពន្លត់អគ្គិភ័យនេះ កម្លាំងសម្ថតកិច្ចបាន យករថយន្តពន្លត់អគ្គិភ័យមកដល់កន្លែងកើតហេតុចំនួន៤គ្រឿង ក្នុងមានរថយន្តជំនួយរបស់ សួនឧស្សាហកម្មកាណាឌីយ៉ា ១គ្រឿង រថយន្តរបស់ក្រុមហ៊ុន ស្រាបៀកម្ពុជា ចំនួន១គ្រឿង និង រថយន្តរបស់ការិយាល័យបង្ការ ពន្លត់អគ្គិភ័យ និង សង្គ្រោះ នៃស្នងការដ្ឋាននគរបាលរាជធានីភ្នំពេញចំនួន២គ្រឿង ។ ក្នុងនោះកម្លាំងសមត្ថកិច្ចបានប្រើប្រាស់បាញ់ពន្លត់អស់២រថយន្តទើបអគ្គិភ័យរលត់ទៅវិញជាស្ថាពរ ដោយបាមបំផ្លាញ សម្លៀកបំពាក់ តុ តួ កៅអី ពួក និង សម្ភារៈមួយចំនួនទៀតនៅក្នុងបន្ទប់ តែមិនបណ្តាលឲ្យនរណាម្នាក់រងរបួសក្នុងហេតុការណ៍នេះទេ៕ ដោយ រ៉ារ៉ា