​ ភ្នំពេញ​ ៖​ គួរឱ្យសង្វេគខ្លាំងណាស់​ ខណៈស្ត្រីម្នាក់មានសតិមិនប្រក្រតី​ ហេីយត្រូវស្ត្រីម្នាក់ទៀតមានសតិមិនប្រក្រតីដូចគ្នាវាយទាំងកំរោល​ បណ្ដាលឱ្យស្លាប់នៅនិងកន្លែង​ ដោយជនដៃដល់ក៏ត្រូវនគរបាលធ្វេីការឃាត់ខ្លួនផងដែរ​ ។​
​ ហេតុការណ៍នេះបានកេីតឡេីងនៅវេលាម៉ោង០៩នឹង៣០នាទី ថ្ងៃទី១៦ ខែឧសភា ឆ្នាំ២០២៣ នៅចំណុចនៅលើដីឡូតិ៍ជាប់ខ្ទមស្នាក់នៅ ផ្លូវព្រៃស កែងផ្លូវបេតុង ភូមិព្រៃសលិច សង្កាត់ព្រៃស ខណ្ឌដង្កោ រាជធានីភ្នំពេញ។
​ សមត្ថកិច្ចបានឱ្យដឹងថា​ ជនសង្ស័យមានឈ្មោះ ឈឹម ថាវី ភេទស្រី អាយុ៥៣ឆ្នាំ (មានសតិមិនប្រក្រតី ស្នាក់នៅខ្ទមកន្លែងកើតហេតុ (បច្ចុប្បន្នឃាត់ខ្លួននៅអធិការដ្ឋាននគរបាលខណ្ឌដង្កោ)។​ ចំណែកសាកសពជនរងគ្រោះ ពុំស្គាល់អត្តសញ្ញាណ និងទីលំនៅនោះទេ​ ដោយជាមនុស្សី​ វ័យប្រហែល៥០ឆ្នាំ កម្ពស់១,៥៣ម ។
​ បេីតាមស្លាកស្នាមវត្ថុតាងប្រមូលចាប់យករួមមាន​ ៖
– ដុំថ្ម៤ដុំ។
– ដំបងឬស្សី១ដើមប្រឡាក់ឈាម។
– ក្តារកំណល់១ (បាឡែត)។
– ឆ្នាំងដែកចំនួន២(ធំ១ តូច១)ឆ្នាំងធំប្រឡាក់ឈាម។
​ សមត្ថកិច្ចបានឱ្យដឹងទៀតថា​ ៖ តាមការបំភ្លឺពីឈ្មោះ ញឹក សុជាតា ភេទស្រី អាយុ២៧ឆ្នាំ ជាអ្នកលក់ដូរនៅលើចិញ្ចើមផ្លូវព្រៃស ជាប់កន្លែងកើតហេតុបានឲ្យដឹងថា: ជនសង្ស័យជាមនុស្សមានសតិមិនប្រក្រតីតែងតែដើរស្រែកច្រៀងល្ខោនតាមផ្លូវ និងស្នាក់នៅខ្ទមជាប់ចិញ្ចើមផ្លូវព្រៃស។ នៅវេលាម៉ោងប្រហែល១១នឹង៣០នាទី ថ្ងៃទី១៥ ខែឧសភា ឆ្នាំ២០២៣ រូបនាងបានឃើញជនសង្ស័យនាំជនរងគ្រោះមកខ្ទមរបស់គាត់ ដោយរូបនាងពុំដែលឃើញជនរងគ្រោះពីមុនមកទេ ដោយជនសង្ស័យបានច្រៀងល្ខោន និងឲ្យជនរងគ្រោះច្រៀងតាម ពេលច្រៀងមិនត្រូវជនសង្ស័យបានយកដំបងឬស្សីវាយទៅលើជនរងគ្រោះ។ នៅវេលាម៉ោងប្រហែល០៩នឹង០០នាទី ថ្ងៃទី១៦ ខែឧសភា ឆ្នាំ២០២៣ ពេលនាងកំពុងដេកលេងនៅលើអង្រឹង បានក្រឡេកទៅមើលខ្ទមជនសង្ស័យ ឃើញជនសង្ស័យកំពុងយកដំបងឬស្សីវាយទៅលើជនរងគ្រោះ ដោយយកក្តារតំណល់ឈើ(បាឡែត) សង្កត់ពីលើជនរងគ្រោះ និងដាក់ដុំថ្មសង្កត់ពីលើបន្ថែម យកសក់ក្បាលជនរងគ្រោះចងជាប់នឹងក្តារកំណល់ឈើ រួចយកឆ្នាំដាក់ពីលើមុខជនរងគ្រោះ ឃើញដូចនេះរូបនាងក៏បានស្រែកហៅគេឲ្យជួយ រួចសមត្ថកិច្ចមកដល់បានឃាត់ខ្លួនជនសង្ស័យ ចំណែកជនរងគ្រោះបានដាច់ខ្យល់ស្លាប់បាត់ទៅហើយ។
​ បេីតាមការពិនិត្យរបស់សមត្ថកិច្ចជំនាញ​ទៅលេីស្លាកស្នាមខ្លួនសាកសពរួមមាន​ ៖
– ស្នាមជាំដាច់រយះនៅថ្ងាសខាងស្តាំ។
– ស្នាមជាំហើមពោរទួកសាច់នៅក្បាលខាងក្រោយ។
– ស្នាមជាំកោសឆ្កូតនៅដើមទ្រូងខាងស្តាំ។
– ស្នាមជាំកោសឆ្កូតនៅកញ្ចឹងកខាងក្រោយ។
– ស្នាមជាំកោសឆ្កូតនៅស្មាខាងស្តាំ និងខ្នងខាងក្រោយ។
​ តាមការបញ្ជាក់ពីគ្រូពេទ្យកោសល្យវិច័យរាជធានីភ្នំពេញ បានសន្និដ្ឋានថា ជនរងគ្រោះបានស្លាប់ដោយសារប៉ះទង្គិចក្បាលធ្ងន់ធ្ងរ (វាយក្បាល)។​ បច្ចុប្បន្ននេះ​ សាកសពប្រគល់ជូនសមត្ថកិច្ចប៉ុស្តិ៍រដ្ឋបាលសង្កាត់ព្រៃស​ ដេីម្បីចាត់ចែងធ្វើបុណ្យតាមប្រពៃណី ៕ដោយ​ ៖​ ភារ៉ា​ ដង្កោ