ភ្នំពេញ ៖ បុរសម្នាក់បានបេីករថយន្តម៉ាក HAWTAIAមួយគ្រឿងស្រាប់តែរេចង្កូតទៅបុកខឿនសួនច្បារពុះចែកទ្រូងផ្លូវបណ្ដាលឱ្យរថយន្តរងការខូចខាតយ៉ាងដំណំ តែសំណាងដែរដែលមិនបង្កឱ្យមានគ្រោះថ្នាក់ដល់ប្រជាពលរដ្ឋ ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៤និង ១០នាទីទៀបភ្លឺថ្ងៃទី៣១ ខែឧសភាឆ្នាំ២០២៣ នៅតាមបណ្ដោយផ្លូវលេខ២១៧ ត្រង់ចំណុចក្បែរនឹងអតីតស្ពានដែកចំការដូង ស្ថិតក្នុងសង្កាត់ដង្កោ ខណ្ឌដង្កោ ។
បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនកេីតហេតុគេឃើញរថយន្តម៉ាកHAWTAIA ពណ៌ទឹកប្រាក់ ពាក់ផ្លាកលេខភ្នំពេញ2BB-7124 បើកបរដោយបុរសម្នាក់ធ្វើដំណើរតាមបណ្តោយផ្លូវលេខ២១៧ ក្នុងទិសដៅពីកើតមកលិច ដោយមានល្បឿនយ៉ាងលឿន ខណៈពេលមកដល់ចំណុចកើតហេតុខាងលើស្រាប់តែរេចង្កូតទៅបុកខឿនសួនច្បារពុះចែកទ្រូងផ្លូវបណ្ដាលឱ្យរថយន្តបាក់កាឡេកង់មុខចំហៀងខាងឆ្វេងទៅមុខលែងរួច តែក្នុងករណីគ្រោះថ្នាក់ចរាចរណ៍នេះមិនបង្កឱ្យប្រជាពលរដ្ឋឬនរណាម្នាក់រងរបួសនោះឡេីយ ។
ក្រោយកេីតហេតុភ្លាមៗ តៃកុងរថយន្តបង្កបានឡើងទៅជិះឡំប្រឺតាគេចខ្លួនបាត់ ទៅ។ បន្ទាប់មកក៏មានសមត្ថកិច្ចមូលដ្ឋានចុះមកដល់ សហការជាមួយនឹងនគរបាលជំនាញធ្វេីការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំភាគីម្ចាស់រថយន្តចូលខ្លួនដោះស្រាយតាមច្បាប់៕
ដោយ ៖ ភារ៉ា ដង្កោ
