ខេត្តត្បូងឃ្មុំ៖ ​រថយន្តម៉ាក Lexus 400h មួយគ្រឿងលួចដឹកឈើប្រណីតពេញព្រៀបចេញពីខេត្តមណ្ឌលគិរី ឆ្លងកាត់ស្រុកកែវសីមា ស្រុកស្នួលខេត្តក្រចេះ រត់ដោយរលូនចូលដល់ទឹកដីស្រុកមេមត់ ខេត្តត្បូងឃ្មុំ ក៏ស្រាប់តែត្រូវបានបង្ក្រាបតែម្ដង។

ការបង្រ្កាបនេះកម្លាំងសមត្ថកិច្ចជំនាញពាក់ព័ន្ធទាំងអស់នៅក្នុងខេត្តត្បូងឃ្មុំបានធ្វើឡើងនៅថ្ងៃទី២ ខែមិថុនា ឆ្នាំ២០២៣នេះខាងក្រោយផ្សារមេមត់ស្រុកមេមត់ ខេត្តត្បូងឃ្មុំ។

រថយន្តបង្ក្រាបបាននោះម៉ាក

Lexus 400h ពណ៌ស ពាក់ស្លាកលេខភ្នំពេញ 2AH-6173 ផ្ទុកឈើសុក្រំពេញព្រៀបតែម្តង។

តាមសេចក្តីរាយការណ៍មកថា មិនមែនមានតែរថយន្តដែលបង្ក្រាបបានខាងលើនេះទេ អាចក៏មានរថយន្តម៉ាកផ្សេងៗជាច្រើនទៀតផងដែរដែលកំពុងតែធ្វើសកម្មភាពលើដងផ្លូវចេញពីខេត្តមណ្ឌលគិរីឆ្លងកាត់ ខេត្តក្រចេះចូលខេត្តត្បូងឃ្មុំឆ្លងទៅខេត្តព្រៃវែងនិងរាជធានីភ្នំពេញ។

   មជ្ឈដ្ឋានជុំវិញនិងអង្គការសង្គមស៊ីវិលរួមទាំងអ្នកសារព័ត៌មានបានកោតសរសើរដល់សមត្ថកិច្ចពាក់ព័ន្ធនៃខេត្តត្បូងឃ្មុំយ៉ាងក្រៃលែងថាឲ្យតែមានសេចក្តីរាយការណ៍ពីបងប្អូនប្រជាពលរដ្ឋឬអ្នកសារព័ត៌មានភ្លាមគឺចេញមកបង្ក្រាបបានបទល្មើសនោះភ្លែតតែម្តង។

បច្ចុប្បន្នរថយន្តបង្ក្រាបបាននោះ សមត្ថកិច្ចជំនាញពាក់ព័ន្ធកំពុងតែវាស់វែងឈើដែលមានផ្ទុកដើម្បីកសាងសំណុំរឿងបញ្ជូនចាត់ការតាមផ្លូវច្បាប់ព្រៃឈើផងដែរ៕ ដោយ ជីវ័ន្ត