ក្រុមជម្រើសជាតិឈីលីបានក្លាយទៅជាម្ចាស់ជើងឯកពានរង្វាន់អាមេរិកខាងត្បូងឬហៅថា Copa America ឆ្នាំ២០១៦នេះក្រោយពីពួកគេយកឈ្នះលើក្រុមជម្រើស ជាតិអាហ្សង់ទីនដោយបាល់ប៉េណាល់ទី ក្នុងវគ្គផ្តាច់ព្រ័ត្រ ។

ក្រុមទាំងពីរបានបញ្ចប់១២០នាទីដោយ ពុំមានក្រុមណាម្នាក់អាចស៊ុតបាល់បញ្ចូលទីគ្នាបានឡើយ ។ ពួកគេទាំងពីរក្រុមនៅសល់គ្នាតែ១០នាក់ម្ខាងក្នុងតង់ទី២ ដោយ កីឡាករ Marcelo Diaz របស់ឈីលីទទួល បានកាតក្រហមនៅនាទី២៨ ហើយខ្សែការ ពារ M.Rojo ទទួលបានកាតក្រហមនៅ នាទីទី៤៣ ។

ក្រុមទាំងពីរធ្លាប់បានជួបគ្នានៅវគ្គផ្តាច់ព្រ័ត្រកាលពីឆ្នាំ២០១៥ហើយក្រុមជម្រើសជាតិឈីលីបានឈ្នះដោយបាល់ប៉េណាល់ទី ដូចគ្នា។ ពួកគេបានរក្សាប្រវត្តិសាស្រ្តដដែល នេះយកឈ្នះលើក្រុមអាហ្សង់ទីនសាជាថ្មីម្តងទៀតនៅក្នុងឆ្នាំ២០១៦ក្នុងទឹកដីសហរដ្ឋអាមេរិក ។

អាហ្សង់ទីនរំពឹងខ្លាំងថា នឹងអាចឈ្នះ ពានរង្វាន់ធំមួយដែលពួកគេរង់ចាំរយៈពេល ២៣ឆ្នាំមកហើយនៅក្នុងឆ្នាំនេះប៉ុន្តែពួកគេមិនអាចធ្វើបានឡើយ ។ ក្រុមអាហ្សង់ទីនឆ្លងទៅវគ្គផ្តាច់ព្រ័ត្រនៃកម្មវិធីធំៗចំនួន៣ ដងជាប់ៗគ្នា ប៉ុន្តែសុទ្ធតែបរាជ័យទាំងអស់ ដោយចាញ់ក្រុមអាល្លឺម៉ង់នៅ World Cup ២០១៤ ចាញ់ឈីលីនៅក្នុងឆ្នាំ២០១៥និង២០១៦នៃកម្មវិធី Copa America។

ខ្សែប្រយុទ្ធMessiដែលឈ្នះពានរង្វាន់ជាកីឡាករលេងល្អបំផុតរបស់ពិភពលោកចំនួន៥សម័យនោះនៅតែមិនអាចជួយ ក្រុមជម្រើសជាតិអាហ្សង់ទីនឲ្យឈ្នះពានធំម្តងណាឡើយ។ ពានរង្វាន់ធំបន្ទាប់គឺ World Cupឆ្នាំ២០១៨នៅក្នុងប្រទេសរុស្ស៊ី តែពេលនោះMessi នឹងឈានចូលដល់វ័យ ៣១ឆ្នាំ ៕

ដោយ៖ សហការី