ខេត្តកណ្ដាល៖ ផ្ទះប្រជាពលរដ្ឋមួយខ្នងត្រូវអគ្គីភ័យលេបត្របាក់បន្តរាលដាលដល់ផ្ទះប្រជាពលរដ្ឋពីរខ្នងទៀត បង្កការភ្ញាក់ផ្អើលឡើងនៅថ្ងៃទី១៨ ខែកក្កដា ឆ្នាំ២០២៣ នៅម៉ោង១០នឹង៣០នាទី ស្ថិតក្នុងភូមិស្វាយអាត់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល។
ផ្ទះដែលរងការខូចខាតនោះមានទំហំ 8គុណនឹង12 ម៉ែត្រ សង់អំពីឈើប្រក់ក្បឿង ខាងក្រោមឥដ្ឋ ម្ចាស់ផ្ទះឈ្មោះ ញ៉ ងួន ភេទប្រុស អាយុ៦៥ឆ្នាំ
ប្រពន្ធ ឈ្មោះ ហៃ គឹមស្រៀន ភេទស្រី អាយុ៥២ឆ្នាំរស់នៅភូមិជាមួយគ្នា។ចំណែកផ្ទះពីរខ្នងទៀត សង់អំពីឈើលើ ថ្មក្រោមប្រក់ក្បឿងដូចគ្នា ជារបស់ឈ្មោះ ១/ជា គឹមឡេង ភេទប្រុសអាយុ៥៣ឆ្នាំរស់នៅភូមិឃុំជាមួយគ្នាឆេះផ្ទះទំហំ៧×៩(ឆេះដំបូលផ្ទះខាងលើខូចខាតស្រាល)។ ២/ញិល សុខ ភេទប្រុសអាយុ៨២ឆ្នាំ រស់នៅភូមិឃុំជាមួយគ្នាឆេះផ្ទះទំហំ៦×៨(ឆេះខូចខាតស្រាល)។
ក្នុងហេតុការណ៍នេះផងដែរកម្លាំងសមត្ថកិច្ចបាន ប្រើប្រាស់រថយន្តពន្លត់អគ្គីភ័យ៣គ្រឿង ប្រើប្រាស់ទឹកចំនួន៥រថយន្ត ភ្លើងត្រូវបានរលត់ជាស្ថាពរ នៅវេលាម៉ោង១២ថ្ងៃខែដដែល។ សមត្ថកិច្ចជំនាញបានសន្និដ្ឋានថា ករណីអគ្គីភ័យដែលធ្វើឲ្យឆេះផ្ទះប្រជាពលរដ្ឋខាងលើនេះ បណ្ដាលមកពីឆ្លងចរន្តអគ្គិសនី ៕ ដោយ៖ស្អាងជ័យ