ភ្នំពេញ : ប្រជាពលរដ្ឋកម្ពុជាជាច្រើនបាននាំគ្នា«សម្តែងនូវឆន្ទៈ» គាំទ្រពេញទំហឹងប្រកបដោយសេចក្តីសោមនស្សរីករាយក្រៃលែងចំពោះការសម្រេចចិត្តរបស់ សម្តេចតេជោ ហ៊ុន សែន ក្នុងការផ្តល់ឱកាសឱ្យយុវជនជំនាន់ក្រោយបានបន្តវេនក្នុងការដឹកនាំប្រទេសជាតិដែលមានឯកឧត្តមបណ្ឌិត ហ៊ុន ម៉ាណែត សម្រាប់អាណត្តិថ្មីទី៧ ឆ្នាំ២០២៣  ។ គ្រប់ទីកន្លែងតែងតែមានការជជែក ពិភាក្សាគ្នាធ្វើឡើងដោយប្រជាពលរដ្ឋ គ្រប់ស្រទាប់វណ្ណៈសម្តែងនូវការគោរព ស្រឡាញ់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលមានភាពឈ្លាសវៃ គិតគូរពីអនាគតប្រទេសជាតិ ការរស់នៅរបស់ប្រជាពលរដ្ឋ ចង់បានថ្នាក់ដឹកនាំប្រទេសមានសមត្ថភាព គុណធម៌ សច្ចធម៌ ការពារសន្តិភាព និងការអភិវឌ្ឍប្រទេសជាតិឱ្យកាន់តែរីកចម្រើនទៅមុខ។ ខណៈសម្ដេចសម្រេច ក្នុងការផ្តល់ឱកាសឱ្យយុវជនជំនាន់ក្រោយបានបន្តវេនក្នុងការដឹកនាំប្រទេសជាតិដែលមានឯកឧត្តមបណ្ឌិត ហ៊ុន ម៉ាណែត សម្រាប់អាណត្តិថ្មីទី៧ ឆ្នាំ២០២៣ ជាជម្រើសមួយដ៏ត្រឹមត្រូវ ដែលប្រជាពលរដ្ឋគាំទ្រពេញទំហឹង ។ ក្រៅពីប្រជាពលរដ្ឋគាំទ្រប្រសាសន៍របស់សម្ដេចតេជោ តាមរយៈថ្នាក់ដឹកនាំ ស្ថាប័នរដ្ឋ អ្នកវិនិយោគក៏បានផ្ញើសារគាំទ្រដូចប្រជាពលរដ្ឋផងដែរ ដោយបញ្ជាក់ថា៖

សូមប្រកាសគាំទ្រទាំងស្រុងនូវសារនយោបាយពិសេសរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាដែលបានថ្លែងនៅរសៀលថ្ងៃទី២៦ ខែកក្កដា ឆ្នាំ២០២៣ ក្នុងការរៀបចំឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី សម្រាប់នីតិកាលទី៧ នៃរដ្ឋសភានេះ ហើយទន្ទឹមនឹងនេះ សូមប្រកាសគាំទ្រទាំងស្រុងចំពោះឯកឧត្តមបណ្ឌិត ហ៊ុន ម៉ាណែត សម្រាប់តួនាទីជានាយករដ្ឋមន្រ្តីនៃព្រះរាជាណាចក្រកម្ពុជា នីតិកាលទី៧ នៃរដ្ឋសភានេះ។

តាមរយៈសារនយោបាយពិសេសនេះ សម្តេចតេជោ ហ៊ុន សែន បានប្រកាសថា ឯកឧត្តមបណ្ឌិត ហ៊ុន ម៉ាណែត នឹងក្លាយជានាយករដ្ឋមន្ត្រីថ្មីនៅល្ងាចថ្ងៃទី២២ ខែសីហា ឆ្នាំ២០២៣ខាងមុខ។
យើងខ្ញុំទាំងអស់គ្នាសូមប្រកាសគាំទ្រទាំងស្រុងចំពោះការសម្រេចចិត្តដ៏ត្រឹមត្រូវរបស់សម្តេចតេជោ ហ៊ុន សែន និងសូមប្រកាសគាំទ្រទាំងស្រុងចំពោះឯកឧត្តមបណ្ឌិត ហ៊ុន ម៉ាណែត សម្រាប់កាន់តួនាទីជានាយករដ្ឋមន្រ្តីថ្មី សម្រាប់អាណត្តិទី៧នេះ ដើម្បីបន្តដឹកនាំប្រទេសកម្ពុជា ពង្រឹងសុខសន្តិភាពកាន់តែរឹងមាំ, ប្រទេសជាតិកាន់តែមានការអភិវឌ្ឍរីកចម្រើននិងមានមោទនភាព ហើយប្រជាជនកាន់តែមានជីវភាពធូរធារនិងរស់នៅប្រកបដោយសេចក្តីសុខសាន្តបន្តទៀត។

ក្នុងឱកាសដ៏ប្រសើរថ្លៃថ្លានេះ យើងខ្ញុំទាំងអស់គ្នា សូមលើកហត្ថប្រណម្យបួងសួងដល់គុណបុណ្យព្រះរតនត្រ័យ គុណកែវទាំងបី ព្រមទាំងវត្ថុស័ក្តិសិទ្ធិក្នុងលោក សូមតាមជួយថែរក្សា ការពារ និងប្រោះព្រំប្រទានពរជ័យបវរសួស្តី ជ័យមង្គលនិងវិបុលសុខគ្រប់ប្រការ ជូនចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, ឯកឧត្តមបណ្ឌិត ហ៊ុន ម៉ាណែត និងលោកជំទាវព្រមទាំងបុត្រា បុត្រី ចៅប្រុស ចៅស្រី។

សូមសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, ឯកឧត្តមបណ្ឌិត ហ៊ុន ម៉ាណែត ព្រមទាំងបុត្រា បុត្រី ចៅប្រុស ចៅស្រី បានសមប្រកបតែនឹងពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕ ដោយ : សិលា