ខេត្តស្វាយរៀង: ជនសង្ស័យត្រូវជាបងថ្លៃម្នាក់ត្រូវបានសមត្ថកិច្ចនគរបាលឃាត់ខ្លួនពាក់ពន្ធ័ករណីរំលោភសេពសន្ថវៈ ប្អូនថ្លៃបានសម្រេចចំនួន៤ដង។

យោងតាមសមត្ថកិច្ចនគរបាលបានអោយដឹងនៅថ្ងៃទី១ ខែសីហា ឆ្នាំ២០២៣នេះថា
ជនសង្ស័យមានឈ្មោះ
ចាន់ វ៉ាង  អាយុ៣៨ឆ្នាំជនជាតិខ្មែរ មុខរបរកម្មករសំណង់ មានទីលំនៅភូមិតាបិប សង្កាត់បាវិត ក្រុងបាវិត ខេត្តស្វាយរៀង ។

ចំណែកជនរងគ្រោះមានឈ្មោះច ជ អាយុ១៩ឆ្នាំជនជាតិខ្មែរ មុខរបរកម្មការិនីរោងចក្រ មានទីលំនៅ នៅខេត្តព្រៃវែង
បច្ចុប្បន្នស្នាក់នៅបន្ទប់ជួល  សង្កាត់បាវិត ក្រុងបាវិត ខេត្តស្វាយរៀង ។
ប្រភពបន្តថា នៅថ្ងៃទី៣០ ខែកក្កដា ឆ្នាំ២០២៣ វេលាម៉ោង ៨:៣០នាទី ប៉ុស្ដិ៍នគរបាលរដ្ឋបាលបាវិត បានទទួលពាក្យបណ្តឹងមួយច្បាប់ពីជនរងគ្រោះ បានប្តឹងចោទប្រកាន់ទៅលើជនសង្ស័យ
ត្រូវជាបងថ្លៃ ដែលបានធ្វើសកម្មភាពរំលោភសេពសន្ថវ:ទៅលើខ្លួន កាលពីវេលាម៉ោង២:០០នាទីទៀបភ្លឺ នាថ្ងៃទី៣០ ខែកក្កដា ឆ្នាំ២០២៣ នៅបន្ទប់ U15 មជ្ឈមណ្ឌលកំសាន្តបាវិត   ។
សមត្ថកិច្ចបញ្ជាក់ថា ក្រោយពីទទួលបានពត៌មានភ្លាម សមត្ថកិច្ច បានចុះទៅដល់កន្លែងកើតហេតុ ដើម្បីធ្វើការស្រាវជ្រាវ  នៅចំពោះមុខសមត្ថកិច្ច ជនរងគ្រោះបានឆ្លើយបំភ្លឺថា ឈ្មោះចាន់ វ៉ាង ត្រូវជាបងថ្លៃ បានចាប់រំលោភខ្លួនបានចំនួនសរុប៤ដងមកហើយ ដោយបានគម្រាម កំហែងធ្វើបាបលើរូបខ្លួន ទើបខ្លួនមិនហ៊ានប្រាប់អ្នកដទៃ។

ជនសង្ស័យឈ្មោះ ចាន់ វ៉ាង បានឆ្លើយសារភាពថា ខ្លួន ពិតជាបានធ្វើសកម្មភាពរំលោភទៅលើជនរងគ្រោះ ជាប្អូនថ្លៃបានសម្រេចចំនួន០៤លើក ប្រាកដមែន ទើបសមត្ថកិច្ចបានឃាត់ខ្លួន ដើម្បីចាត់ការបន្តតាមច្បាប់៕ដោយ៖សុថាន