ខេត្តកំពង់ឆ្នាំង ៖ ផ្ទះ១ខ្នងរបស់ស្រ្តីក្រីក្រម្នាក់ត្រូវបានអគ្គិភ័យឆេះទាំងស្រុង អស់ខ្ទេចគ្មានសល់ ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១និង៣០នាទីរំលងអធ្រាត ឈានចូលថ្ងៃទី១ ខែសីហា ឆ្នាំ២០២៣ ស្ថិតនៅភូមិឈូក ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង ។
យោងតាមការបញ្ចាក់ពីមន្រ្តីនគរបាលឃុំធ្លកវៀន បានប្រាប់ឱ្យដឹងថា គ្រួសារក្រីក្រដែលត្រូវអគ្គិភ័យឆេះផ្ទះនេះ មានឈ្មោះ ឯល គ្រឿន ភេទស្រី អាយុ ៧៤ឆ្នាំ រស់នៅក្នុងភូមិឃុំខាងលើ ។ មានទំហំ ៤ម×៦ម ដំបូលប្រក់ស្លឹក ជញ្ជាំងស្លឹក ឆេះទាំងស្រុង ។សូម្បីតែ សំបុត្រកំណើត សៀវភៅគ្រួសារ និងប័ណ្ណក្រីក្រ និងថវិកាមួយចំនួនផងដែរ ។
បើតាមការបញ្ជាក់របស់ស្ត្រីរងគ្រោះ ដែលជាម្ចាស់ផ្ទះបានប្រាប់សមត្ថកិច្ចឱ្យដឹងថា នៅយប់ថ្ងៃទី៧ ក្រោយពីដំាបាយស្លរួច រូបគាត់ក៍បានហូបបាយ រួចរាល់ បានចូលសម្រាក ប៉ុន្តែភ្លេចមិនបានពន្លត់ភ្លើងដែលនៅនឹងជើងក្រានទេ លុះយប់ឡើងដោយសារមានខ្យល់ខ្លះផងបង្ករឱ្យភ្លើងដែលនៅនឹងជើងក្រាន បន្តឆាបឆេះសន្ធោសន្ធៅតែម្តង ខណៈដែលរូបគាត់កំពុងសម្រាកនៅក្នងផ្ទះនោះ នៅពេលដែលរត់ចេញនោះមិនបានយកអ្វីបាននោះទេ ទ្រព្យសម្បត្តិតិចតួចដែលគាត់មានក៍ត្រូវអគ្គិភ័យឆេះបំផ្លាញខ្ទេចខ្ទីអស់រលីង គ្មានសល់អ្វីនោះទេ គឺនៅសល់តែខោអាវមួយចង្កេះតែប៉ុណ្ណោះ ។ ពេលដែលឆេះនោះអ្នកស្រុកបានមកជួយដែរ តែមិនអាចជួយទាន់ ព្រោះភ្លើងបានឆេះខ្លាំងទៅហើយ ។
ស្រ្តីរងគ្រោះរូបនបានប្រាប់បញ្ជាក់ថា ពេលនេះ គាត់ពិតជាអស់សង្ឃឹម ព្រោះផ្ទះដែលធ្លាប់រស់នៅនាពេលនេះឆេះអស់មិនដឹងអីស្នាក់នៅនោះទេ មានតែពឹងលើបងប្អូនសប្បុរសជនជិតឆ្ងាយនេះឯង ជួយរូបគាត់ក្នុងគ្រាដ៍លំបាកនេះ ៕ ដោយ៖ចន្ថា