ខេត្តបាត់ដំបង៖ ដេីម្បីការពារសុខសុវត្ថិភាពជូនប្រជាពលរដ្ឋក្នុងមូលដ្ឋានស្រុកបាណន់ និងទប់ស្កាត់បទល្មើសចោរលួច ឆក់ ប្លន់ នឹងបទល្មេីសផ្សេងៗទៀត កម្លាំងនគរបាលជំនាញស្រុក បានជិះល្បាត រហូតឈានដល់ការបង្រ្កាប និងឃាត់ខ្លួនមុខសញ្ញាចោរលួចទ្រព្យសម្បត្តិរបស់ប្រជាពលរដ្ឋម្នាក់ ក្នុងបទល្មើសជាក់ស្តែង។ នេះបេីយោងតាមប្រភពព័ត៍មានពីលោកវរសេនីយ៍ទោ សំ វីរះ អធិការនគរបាលស្រុកបាណន់ បានឱ្យដឹងនៅព្រឹកថ្ងៃសៅរ៍ទី១៩ ខែសីហា ឆ្នាំ២០២៣។
លោកវរសេនីយ៍ទោ សំ វីរះ អធិការនគរបាលស្រុកបាណន់ បានឱ្យដឹងទៀតថា ជារៀងរាល់ថ្ងៃយប់លោកតែងតែដឹកនាំកម្លាំងចម្រុះចុះល្បាតក្នុងមូលដ្ឋាន ជាក់ស្ដែងកាលពីល្ងាចម្សិលមិញនេះ នៅចំណុចក្រុមទី១៧ភូមិតាង៉ែនឃុំតាគ្រាម ស្រុកបាណន់ ខេត្តបាត់ដំបង ស្រាប់តែប្រទះឃើញជនសង័្សយម្នាក់ឈ្មោះព្រឿន ម៉ាច ភេទ ប្រុសអាយុ១៩ឆ្នាំ រស់នៅភូមិតាង៉ែន ឃុំតាគ្រាម ស្រុកបាណន់ កំពុងធ្វើការសកម្មភាពលួចខ្សែភ្លើង និងម៉ូទ័របូមទឹករបស់ប្រជាពលរដ្ឋ ក៏ចាប់ឃាត់ខ្លួននាំមកកាន់អធិការដ្ឋាននគរបាលស្រុកដើម្បីធ្វើការសាកសួរ ស្រាវជ្រាវតែម្តង។
ជាក់ស្ដែងវត្ថុតាងដកហូតបានរួមមាន៖ ម៉ូទ័របូមទឹក ចំនួន០១និងខ្សែភ្លើងជាប់ជាមួយម៉ូទ័រប្រវែង៣៧ម៉ែត្រ ។
សូមជម្រាបជូនថា មូលហេតុដែលធ្វើការឃាត់ខ្លួននេះ គឺនៅវេលាថ្ងៃខែខាងលើ ជនសង័្សយចំនួន ០២នាក់ បានធ្វើសកម្មភាពលួចយកទ្រព្យសម្បត្តិអ្នកដទៃដែលមានឈ្មោះ ម៉ៅ ប៊ឹប ភេទប្រុសអាយុ ៥៣ឆ្នាំ រស់នៅទីកន្លែងកើតហេតុភូមិតាង៉ែន ឃុំតាគ្រាម ស្រុកបាណន់ ខណៈដែលជនរងគ្រោះ ដាក់ម៉ូទ័របូមទឹកនៅពីក្រោយ រោងចាំចំការរបស់ខ្លួនជនសង័្សយចំនួន ០២នាក់បានធ្វើសកម្មភាពលួចយកម៉ូទ័របូមទឹករបស់គាត់ ហើយពេលកំពុងធ្វើសកម្ម ភាពនេះ ត្រូវបានម្ចាស់ឃើញទាន់ក៏ស្រែកឆោឡោឡើង ធ្វើឱ្យជនសង័្សយរត់ចេញពីកន្លែងកើតហេតុ ដោយកាន់យកម៉ូទ័រទៅជាមួយផងប៉ុន្តែរត់បានតែបន្តិចត្រូវបានជនរងគ្រោះនិងអ្នកភូមិជួយចាប់បានម្នាក់ ដូចមានឈ្មោះខាងលើ រីឯបក្សពួកម្នាក់ទៀតរត់ គេចខ្លួនបាត់ ប៉ុន្តែសមត្ថកិច្ចស្គាល់អត្តសញ្ញាណហើយ។
បច្ចុប្បន្ននៅព្រឹកថ្ងៃសៅរ៍ទី១៩ ខែសីហានេះ សមត្ថកិច្ចនគរបាលស្រុកបានរៀបចំកសាងសំណុំរឿងបញ្ជូនមកការិយាល័យជំនាញអនុវត្តតាមនីតិ វិធីច្បាប់ហើយរីឯវត្ថុតាងបានប្រគល់ជូនម្ចាស់យកទៅប្រើប្រាស់វិញ៕
ដោយ៖អរុណរះ
