ខេត្តកណ្តាល៖ នារីមកពីខេត្តក្រចេះម្នាក់ ទើបតែមកស្នាក់នៅភ្នំពេញបានរយៈពេល៤ថ្ងៃ បានចាញ់ល្បិចព្រាននារីនៅក្រុងតាខ្មៅអស់ខ្លួន អស់ប្រាណដោយសារតែព្រាននារីម្នាក់នេះល្បួងនាងឲ្យឡើងជិះម៉ូតូជាមួយឌុបដើរលេង ហើយហួសចូលបន្ទប់ផ្ទះសំណាក់ទាំងកណ្តាលថ្ងៃតែម្តង ។
ហេតុការណ៍នេះបានកើតឡើងកាលពីវេលាម៉ោង១១ព្រឹកថ្ងៃទី២៨ ខែកក្កដា ឆ្នាំ២០១៥ ស្ថិតនៅចំណុច បន្ទប់លេខ៣៨ ផ្ទះសំណាក់២២២ ភូមិ-សង្កាត់ដើមមៀន ក្រុងតាខ្មៅ ខេត្តកណ្ដាល ។ ទោះបីយ៉ាងណា ជនសង្ស័យត្រូវសមត្ថកិច្ចចាប់ខ្លួន បន្ទាប់ពីមានការប្តឹងផ្តល់ពីនារីរងគ្រោះ ។
សេចក្តីរាយការណ៍បានបញ្ជាក់ថា ជនសង្ស័យដែលត្រូវចាប់ខ្លួនពីបទរំលោភសេពសន្ថវៈ ឈ្មោះ ថុល ចាប ភេទប្រុស អាយុ៣១ឆ្នាំ មុខរបររត់ម៉ូតូឌុប ស្នាក់នៅផ្ទះជួល ភូមិលេខ១ ឃុំស្វាយរលំ ស្រុកស្អាង ខេត្តកណ្តាល ទីលំនៅអចិន្ត្រៃយ៍ ភូមិព្រៃចម្ការជើង ឃុំស្វាយជ្រុំ ស្រុកមេសាង ខេត្តព្រៃវែង ។
ប្រភពបានបន្តថា នៅថ្ងៃកើតហេតុ ម៉ោងប្រហែល៨ព្រឹក ជនរងគ្រោះបានដើរចេញមកក្រៅផ្ទះជួល គោលបំណងចង់ដើរលេងនៅជិតៗផ្ទះជួល (ជនរងគ្រោះ មកក្រុងតាខ្មៅបាន៤ថ្ងៃតាមរយៈប្អូនថ្លៃ ដើម្បីធ្វើការរោងចក្រKL)។ ពេលដើរដល់ចំណុចផ្លូវ១១៥ កែងផ្លូវ២១ ត្រូវបានជនល្មើសហៅឲ្យជិះម៉ូតូឌុប តែជនរងគ្រោះបានឆ្លើយទៅវិញថា អត់មានលុយជិះទេ គ្រាន់តែចង់ដើរ លេងនៅជិតៗហ្នឹង ព្រោះខ្លូនទើបតែមកស្នាក់នៅទីនេះលើកទី១។ ជនសង្ស័យបាននិយាយវិញថា ចឹងមកជិះជាមួយគេមក គេអតយកលុយទេ ហើយព្រមជូនដើរលេងឲ្យស្គាល់ក្រុងតាខ្មៅទៀត។ ជនរងគ្រោះក៏យល់ព្រម ពេលនោះជនសង្ស័យ បានដឹកជនរងគ្រោះដើរលេង អស់រយៈពេលប្រហែលពីរបីម៉ោង ទើបដឹកមកដល់ចំណុចកើតហេតុខាងលើ ហើយបានអូសដៃចូលក្នុងបន្ទប់ផ្ទាល់ដី បន្ទប់លេខ៣៨ ពេលនោះជនរងគ្រោះបានស្រែកដែរ តែគ្មានគេជួយ។ ពេលនៅក្នុងបន្ទប់ជនសង្ស័យ បានបង្ខំឲ្យជនរងគ្រោះដេកជាមួយខ្លួន តែជនរងគ្រោះមិនព្រម ហើយបានប្រតាយប្រតប់គ្នាអស់រយៈពេល២ម៉ោង រួចជន រងគ្រោះបានខាំទៅជនសង្ស័យស្នាមនៅលើដើមទ្រូង ។
បន្ទាប់មកជនរងគ្រោះអស់កម្លាំង ក៏ត្រូវជនល្មើស ចាប់រំលោភសេពសន្ថវៈបានសម្រេចតែម្តង ៕ ស្អាងជ័យ
