ខេត្តបន្ទាយមានជ័យ : នៅព្រឹកថ្ងៃអាទិត្យ ទី១៧ ខែកញ្ញា ឆ្នាំ២០២៣នេះ ជនសង្ស័យម្នាក់ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបន្ទាយមានជ័យ បញ្ជូនទៅសាលាដំបូងខេត្ត នៅ ដើម្បីអនុវត្តតាមនីតិវិធី ជាប់ពាក់ព័ន្ធទៅនឹងករណីលួចម៉ូតូ។
គួររំលឹកឡើងថាឃាត់ខ្លួនជនសង្ស័យលួចម៉ូតូ បានប្រព្រឹត្តកាលពីវេលាម៉ោង២៣និង៣០នាទីថ្ងៃទី១២ ខែកញ្ញា ឆ្នាំ២០២៣ នៅចំណុច ផ្សារទឹកពុះ មុខកាស៊ីណូផារ៉ាមិច ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ យោងតាមពាក្យបណ្តឹងឈ្មោះ មាស កុសល់ (ភុប) ភេទប្រុស អាយុ៣១ឆ្នាំ មានទីលំនៅបច្ចុប្បន្ន ភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ បានឱ្យដឹងថា ជនសង្ស័យឈ្មោះ ខៀវ ពិសិដ្ឋ (ដូង) ភេទប្រុស អាយុ៣១ឆ្នាំ ជនជាតិខ្មែរ បច្ចុប្បន្នស្នាក់នៅភូមិក្បាលកោះ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។ចំណែកជនរងគ្រោះជាសន្តិសុខយាមនៅផ្កាយប្រាំផ្សារទឹកពុះ នៅថ្ងៃកេីតហេតុ មានជនជាតិឥណ្ឌូនេស៊ីពុំស្គាល់អត្តសញ្ញាណ ស្គាល់តែមុខនៅកន្លែងធ្វើការចំនួន០២នាក់ បានមកសុំខ្ចីម៉ូតូរបស់ខ្លួនជិះទៅទិញអីហូប នៅម្តុំផ្សារទឹកពុះ ក្រោយមកពួកគេបានមកប្រាប់ខ្លួនថា ម៉ូតូត្រូវបានចោរលួចបាត់។ ក្រោយពីទទួលបានបណ្តឹងរួច កម្លាំងមូលដ្ឋានកងរាជអាវុធហត្ថក្រុងបានចុះដល់កន្លែងកើតហេតុ និងធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យ ហើយនាំយកមកកាន់មូលដ្ឋានកងរាជអាវុធហត្ថក្រុងប៉ោយប៉ែត ដើម្បីសួរនាំ និងបញ្ជូនបន្តទៅកាន់ការិយាល័យព្រហ្មទណ្ឌបញ្ជាការដ្ឋានកងរាជអាវុធហត្ថខេត្តដើម្បីបន្តនីតិវិធីបញ្ជូនទៅតុលាការ ចំណែកឯម៉ូតូត្រូវបានដកហូតប្រគល់ជូនទៅម្ចាស់ដើមជាជនរងគ្រោះវិញ៕
ដោយ៖ ស សម
